A "marcha obreira" volve tomar as rúas contra o peche de Alcoa na Coruña

Preto dun milleiro de persoas, segundo os cálculos da Policía Local, manifestáronse na Coruña contra o peche da planta de Alcoa e en demanda dunha "solución", nunha nova xornada de protestas convocada polos traballadores. A "marcha obreira", como a denominaron, partiu da fábrica de Alcoa para concluír ante a Delegación do Goberno en Galicia. Desde a planta coruñesa, partiron os traballadores, case 400 empregados, aos que se sumaron na praza da Palloza familiares e outros cidadáns.

A primeira pancarta, co lema 'Déixannos sen futuro', portábana familiares dos traballadores, entre eles nenos. A esta, seguíalle outra coa lema 'Non ao peche. Enerxía solución', ademais de pancartas de traballadores doutras empresas e de diferentes colectivos que se sumaron a esta xornada de protesta. Entre os asistentes, figuraban tamén representantes de distintas formacións políticas.

Durante a mobilización, coreáronse proclamas como 'Alcoa, escoita, Coruña está en loita' ou 'Alcoa non se pecha, isto é a guerra'. A eles, sumouse, xa á chegada da Delegación do Goberno, o lema de 'Cuadrilla de mangantes, fóra yankees'. Neste lugar, un grupo de traballadores fixo soar os seus cascos --durante o percorrido levaron a vestimenta de traballo-- golpeándoos contra o chan.

ENCONTRO CO DELEGADO DO GOBERNO

Posteriormente, o delegado do Goberno en Galicia, Javier Losada, recibiu a unha representación do comité de empresa da planta da Coruña. En declaracións aos medios, Losada reiterou que o Goberno traballará "até o último minuto" para lograr que a empresa reverta a súa decisión.

De novo, volveu apelar á unidade das administracións, á vez que defendeu que, como sosteñen os traballadores, "hai futuro" para as plantas da Coruña e Avilés (Asturias). "As dificultades non nos deben achantar", insistiu.

Por outra banda, explicou que se está tratando de pechar a axenda para poder materializar "a próxima semana ou a seguinte" un encontro dos presidentes autonómicos de Asturias e Galicia coa ministra de Industria, Reyes Maroto.

Desde o comité de empresa, o seu presidente, Juan Carlos López Corbacho, acusou a Alcoa de "botar balóns fóra", á vez que ratificou que presentarán unha denuncia na xustiza europea. Por outra banda, explicou que este martes manterán unha reunión de consultas polo expediente de extinción de contratos presentado.

Así mesmo, avanzou a intención dos traballadores de presentar "unha proposta formal" ás administracións e á empresa para garantir o futuro das plantas. "Hai que buscar solucións de consenso e loitar por unha solución", insistiu.