Ana Pontón visitará a Oriol Junqueras no cárcere para expresarlle a súa solidariedade

A portavoz nacional do BNG, Ana Pontón, visitará o vindeiro luns, 5 de novembro, a Oriol Junqueras (ERC) na prisión de LLedorners, encontro acordado hai semanas e que dá continuidade ao mantido pola  eurodeputada Ana Miranda no mes de setembro co propio Junqueras e Raül Romeva. Este anuncio chega logo de que Xosé Manuel Beiras e Antón Sánchez tamén dixeran a pasada semana que van visitar a estes dous líderes cataláns.

Oriol Junqueras e Ana Pontón | Fonte: BNG.

Pontón, acompañada de Miranda, trasladará a Junqueras o apoio e solidariedade do BNG  e analizarán a actual situación política e xudicial, tras coñecerse este venres que a Fiscalía finalmente acusa os políticos presos cataláns de rebelión, pedindo a Oriol Junqueras a pena máxima de 25 anos de cárcere.

Para a líder do BNG, a situación de Junqueras e do resto de presos relacionados co referéndum e a declaración simbólica de independencia en Cataluña é produto da “profunda deriva autoritaria do Estado español, que persegue e encarcera ou exilia a políticos, sindicalistas, activistas, tuiteiros ao tempo que permite a apoloxía franquista nos medios de comunicación e ataques á diversidade lingüística do Estado", denuncian os nacionalistas.

Pontón interpreta que "o sentir maioritario da sociedade é de fastío e indignación” por unha realidade á que pide responder colectivamente cun “basta xa, ben alto e claro”. "É o momento de plantarlle cara ao neofraquismo e desenmascarar a imaxe de demócratas dos Salvinis e Bolsonaros españois”, di.

Para o BNG, que Junqueras, Forcadell, Romeva e o resto de políticos cataláns continúen presos, un ano despois do Referendo de independencia celebrado o 1 de outubro, constata "a incapacidade do Goberno central para buscar e acordar solucións políticas a un conflito exclusivamente político".

Neste sentido, a líder do BNG afirma  que o Estado español actúa "desde a persecución das ideas, e contra a  cultura do acordo e do diálogo como o que  practicaron Canadá co Quebec, o Reino Unido con Escocia ou o vindeiro ano Dinamarca coas Illas Feroe". O problema de fondo para a portavoz do BNG  é que "o Estado español se nega  a asumir o seu carácter plurinacional e a actuar en consecuencia, recoñecendo o dereito a decidir".

Ana Pontón explica que a situación que padecen Junqueras e o resto de políticos cataláns encarcerados só pode ser cualificada de "ensañamento" e indica que, como cada vez denuncian máis membros da propia xudicatura, "non é xa un asunto de independencia si ou non, é un asunto ligado á defensa da democracia, das liberdades e dos dereitos, e iso é o que  está en perigo”.

Pontón recalca que “no proceso catalán estamos desde o comezo ante unha clara vulneración da separación de poderes por parte do Estado, cunha evidente instrumentalización da Xustiza e dos Corpos e forzas de seguridade. Hoxe fano contra o proceso catalán, mañá farano contra quen lles moleste. As persoas que defendemos a democracia e os dereitos temos que erguer a voz e denuncialo", expón.

LIBRE ASBSOLUCIÓN

Para o BNG non é o tempo de “rebaixas cosméticas nas peticións de condenas”, é  momento da “libre absolución e busca dunha solución política  a un conflito político que só pode pasar polo respecto do dereito do pobo catalán a decidir libre e democraticamente o seu futuro”.

Pontón asegura que as condenas non son só un ataque ao soberanismo catalán, representan  “unha advertencia” do que  pode acontecer a outras  forzas políticas que, como no caso do nacionalismo galego, “cuestionamos as decisións dun Estado que sistematicamente discrimina a Galiza e impide desenvolver os nosos dereitos como pobo”.