O Pleno de Ourense aproba pedir a dimisión do alcalde e da concelleira de Recursos Humanos
Foi a través dunha moción que presentaron Ourense en Común e PSdeG pola anulación do nomeamento irregular do xefe de persoal.
Por Europa Press / Redacción | SANTIAGO DE COMPOSTELA | 02/11/2018 | Actualizada ás 19:44
O Concello de Ourense aprobou con 14 votos a favor e 13 en contra a moción presentada no pleno extraordinario deste venres por Ourense en Común e PSdeG na que solicitan a dimisión da concelleira de Persoal e Recursos Humanos, Flora Moure, e do alcalde de Ourense, Jesús Vázquez Abad, pola anulación do nomeamento irregular do xefe de servizo de persoal por parte do actual goberno municipal.
O Tribunal Superior de Xustiza de Galicia (TSXG) desestimara o pasado 19 de setembro o recurso de apelación interposto polo Concello de Ourense e o xefe de Recursos Humanos do Consistorio ourensán contra a anulación do seu nomeamento, decretada polo Xulgado do Contencioso-Administrativo número 2 de Ourense.
Ourense en Común e PSdeG apoiaron a cuestión, do mesmo xeito que cinco concelleiros de Democracia Ourensá, formación que decidiu repartir o seu voto "para demostrar" aos edís dos grupos que presentaron a moción "que son uns nenos pequenos" por non apoiar a súa moción de censura ao rexedor presentada por Democracia Ourensá o pasado mes de maio.
O portavoz do PSdeG, José Ángel Vázquez Barqueiro, destacou que "o acontecido parece que non ten transcendencia", xa que o alcalde "permite" que o xefe de Persoal "continúe, tome decisións e participe en procedementos administrativos".
Pola súa banda, o portavoz de Ourense en Común, Martiño Xosé Vázquez Mato, destacou que o grupo popular obrigou á súa formación e á socialista a "recorrer á xustiza" por "non facer caso" a un recurso de reposición por vía administrativa presentado por Ourense en Común en primeira instancia contra o decreto en cuestión.
"O xefe de persoal 'enchufado', que vai levar a cuestión ao Tribunal Superior, sacou unha oferta pública de emprego con informes en contra da Intervención municipal e unha RPT fiscalizada contra a Intervención municipal creando fichas adaptadas ás persoas que estaban no Concello e que recibiu máis de cen alegacións", criticou Vázquez Mato.
Neste sentido, esgrimiu que as sentenzas xudiciais "deixan meridianamente claras" as responsabilidades políticas, "se non outras", da concelleira de Recursos Humanos e do alcalde de Ourense.
RESPONSABILIDADE DE PP E PSDEG
Mentres, o líder de Democracia Ourensá, Gonzalo Pérez Jácome, subliñou que a sentenza non só afecta o Partido Popular, senón que tamén "lle dá caña" ao PSdeG "por urdir as bases" para seleccionar a esa persona, polo que ambas as formacións "están no allo".
Finalmente, o portavoz do Partido Popular, José Araújo, defendeu que a anulación de actos administrativos "dáse en todas as administracións" e acusou ao PSdeG de "tergiversar" a información que aparece na sentenza para "transformar a realidade".
