Por E.P. | SANTIAGO DE COMPOSTELA | 07/11/2018 | Actualizada ás 18:17
A confederación de empresarios de Galicia (CEG) celebra na mañá deste xoves un comité executivo que abordará, entre outras cuestións, a situación da reforma dos estatutos da institución e as futuras eleccións para elixir novo presidente.
Ante a vacante na presidencia desde a saída de Antón Arias, a patronal galega está rexida por unha xunta de vicepresidentes, con Antonio Fontenla como portavoz por idade. Algúns representantes da organización como o de Lugo, Jaime López, considera que é o momento de convocar comicios e así o exporá no encontro.
Pola súa banda, o responsable dos empresarios de Pontevedra, Jorge Cebreiros, mostra a súa "sorpresa" pola petición de Lugo, posto que "acaba de terminar o traballo" da comisión de estatutos e "chegouse a un borrador con gran consenso e diferenzas pequenas".
Na súa opinión, en 15 días podería estar listo o documento definitivo, que debería ir á asemblea, para que fose este órgano o que validase os novos estatutos. A nova proposta de estatutos contempla novidades como a limitación de mandatos e a incompatibilidade para presidir a CEG e unha confederación provincial.
CRISE
As tensións internas na CEG arrástranse desde a época de José Manuel Fernández Alvariño, que substituíu a Fontenla en 2013. Críticos coa súa xestión bloquearon os apenas dous anos de goberno, ao atribuírlle supostas irregularidades nos gastos da confederación.
A el deulle a substitución Antonio Dieter Moure, que se alzou na presidencia da CEG por 10 votos fronte ao seu rival, o tamén ourensán José Manuel Pérez Canle. Moure estivo menos dun ano no cargo e, aínda que alegou motivos persoais, os problemas no seo da patronal foron clave na súa saída.
Mentres, no seu adeus ante os xornalistas, Antón Arias dixo que esperaba que a súa decisión servise como un revulsivo á institución, a modo de "catarse", para que os seus integrantes reflexionasen e pensasen "máis nos intereses do conxunto que en intereses persoais".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.