O PSdeG agarda solucións para Alcoa en Madrid

A deputada do PSdeG Patricia Vilán afirmou que "oxalá" entre as ministras de Industria e Transición Ecolóxica, Reyes Maroto e Teresa Ribera, respectivamente, e os presidentes da Xunta e do Principado de Asturias "se poidan poñer solucións enriba da mesa" para Alcoa.

Preguntada respecto diso en rolda de prensa, Vilán lembrou o compromiso cos traballadores da planta de Alcoa na Coruña de todo o Parlamento galego. "O necesario", segundo subliñou, é atopar "unha solución" para esta factoría, para que os seus empregados "poidan seguir traballando" e tamén polo impacto que o fin da actividade tería para a contorna.

Feijóo, xunto ao seu homólogo do Principado de Asturias, Javier Fernández, reúnese este xoves coas ministras de Industria e Transición Ecolóxica, Reyes Maroto e Teresa Ribeira, respectivamente, para analizar o peche das factorías de Alcoa en Avilés e A Coruña.