O PPdeG pide ao Goberno central que execute as propostas que lle fixo para evitar o peche de Alcoa

O secretario xeral do PPdeG, Miguel Tellado, reivindicou este xoves que a Xunta, con Alberto Núñez Feijóo, á fronte, "fixo propostas" para tentar que Alcoa non peche a planta da Coruña, á vez que sinalou ao Executivo que dirixe Pedro Sánchez, xa que é —esgrimiu— "o que ten que executalas e ofrecer unha alternativa".

Antes da reunión en Madrid esta tarde, Tellado lembrou que Feijóo pedirá "unha solución" para a continuidade das plantas, cun plan industrial que as "faga viables e garanta a súa continuidade", así como un marco enerxético "estable" para un período de cinco anos co foco posto nas empresas electrointensivas.

"É o Goberno o que ten que clarificar a súa postura sobre interrumpibilidade e executar a partida complementaria de 150 millóns de euros complementaria ás poxas recollida nos orzamentos en vigor", demandou, antes de lembrar que Feijóo tamén incidirá en que Alcoa debe "retirar de forma inmediata" o expediente de extinción de emprego.

"Pedimos o mesmo que esiximos ao Goberno de Rajoy en 2014, cando Alcoa se enfrontou a unha situación similar. Non demandamos nada novo, nada distinto. Non se trata de buscar culpables, senón solucións, e o traballo conxunto das administracións é fundamental", advertiu o dirixente popular.

A continuación, defendeu o papel da Xunta e do PP non só por "responder con rapidez" tras coñecer o anuncio de Alcoa e ofrecerse a "mediar", ademais de buscar "o consenso" para que "a voz de Galicia sexa máis forte", senón tamén por "anticiparse" e informar o Goberno central do risco que había con Alcoa.

Na liña do que Feijóo trasladou na Cámara autonómica na pasada xornada, lembrou que o presidente deu conta en xullo a Pedro Sánchez da situación, do mesmo xeito que fixo posteriormente o conselleiro de Economía, Francisco Conde, a outros membros do Goberno central e noutros escenarios como a Conferencia Sectorial de Industria.

Esta forma de actuar contrasta, segundo reprobou, coa "certa pasividade" que, a xuízo dos populares, mostrou o Goberno de España, tendo en conta que "foi alertado desde xullo" da situación e, aínda así, "nada se fixo".

Por iso, o PPdeG reclama "un cambio de actitude con implicación real, que se executen os 150 millóns complementarios consignados nos orzamentos e que se poña luz nas poxas de interrumpibilidade de 2019, que teñen que ser convocadas en breve.

REUNIÓN "FRUTÍFERA"

Con todo, lamentou que, frente a iso, o Executivo estatal envíe "mensaxes" que parecen encamiñadas a "repetir erros de gobernos socialistas anteriores que provocaron unha enerxía máis cara".

Tellado asegurou que, nunha situación deste tipo, "non hai cores, senón compromisos", e sinalou que tanto Asturias como Galicia puxeron propostas sobre a mesa, que agora toca "executar" ao Goberno central.

Así, concluíu que espera que a reunión desta tarde sexa "frutífera" e poida dar "tranquilidade" ás 400 familias galegas afectadas polo expediente de Alcoa na Coruña. "Nos últimos 10 anos sempre se conseguiu atopar unha solución", resolveu.