Temas: TEMPORAL

O temporal descarga até 150 litros por metro cadrado e ventos de 144 quilómetros por hora

O sur da provincia da Coruña é a zona máis afectada. O 112 Galicia rexistra 425 incidencias. 4.400 usuarios pontevedreses, sen electricidade.

Por Europa Press / Redacción | SANTIAGO DE COMPOSTELA | 10/11/2018 | Actualizada ás 13:29

Comparte esta noticia

O temporal de vento e choiva que afectou este venres a Galicia deixou rexistros de auga acumulada por encima dos 100 litros por metro cadrado en seis localidades galegas.

Temporal en Galicia
Temporal en Galicia | Fonte: Miguel Núñez.

En concreto, segundo os datos de Meteogalicia, os rexistros máis altos de choiva foron en Lousame (A Coruña), onde se alcanzaron os 149,8 litros por metro cadrado en datos acumulados. Así mesmo, en Santa Comba, as cifras foron de 144,5 litros por metro cadrado.

A zona máis afectada pola auga correspondeuse co sur da provincia da Coruña, onde os rexistros chegaron a 104 litros por metro cadrado en Val do Dubra, 137 en Zas ou 108 en Boiro. Unha localidade de Pontevedra, Fornelos de Montes, foi o sexto municipio máis afectado, con 125 litros por metro cadrado de choiva.

En canto ao aire, os datos máis relevantes do paso da fronte por Galicia foron no norte, en Cedeira, onde os refachos alcanzaron os 143,6 quilómetros por hora, seguida de Viveiro, con 135, e Burela, con 128.

No interior ourensán, en Carballeda de Valdeorras, o vento soprou até os 134,3 quilómetros por hora e en Pontevedra os datos máis altos foron os de Cuntis, onde os refachos alcanzaron os 122,8 quilómetros por hora na estación de Monte Xesteiras.

425 INCIDENCIAS

O Centro Integrado de Atención a Emerxencias (CIAE) 112-Galicia rexistrou nas últimas 24 horas un total de 425 incidencias relacionadas coa borrasca.

O maior número de intervencións produciuse na provincia da Coruña, onde se contabilizaron 202, seguida de Pontevedra, onde tiveron lugar 170. Do mesmo xeito, en Lugo houbo 35 incidencias e en Ourense 18.

A caída de árbores e ramas nas vías de circulación (102), restos de accidentes e obxectos varios nas estradas (20) e inundacións na vía (13) foron as incidencias máis repetidas.

En canto aos concellos máis afectados, na provincia de Pontevedra destaca Vigo, con 28 incidencias, Pontevedra con 14 e Vilagarcía con cinco.

No Concello de Santiago de Compostela alcanzáronse as 24 incidencias, mentres que en Teo houbo oito e en Lousame catro. Na provincia de Lugo destacan Abadín, A Pontenova, Viveiro e Ribadeo, con tres incidencias cada un; e, en Ourense, os concellos de San Xoán de Río, Punxín e Ourense, onde se interveu nunha ocasión.

SEN ELECTRICIDADE

O temporal mantén a uns 4.400 usuarios pontevedreses sen electricidade.

Segundo confirmaron fontes de Naturgy, durante a mañá do sábado tiveron constancia de cortes na subministración duns 4.400 usuarios concentrados na provincia de Pontevedra.

En concreto, os afectados pertencen aos concellos das Neves, A Cañiza, Salvaterra, Crecente e Arbo e na zona traballan 25 operarios para restablecer a subministración. A maiores, foron desprazados durante a xornada grupos electróxenos por se se prolongasen os labores de reparación.

Temas: TEMPORAL
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta