Decomisan animais salvaxes disecados a un veciño de Vigo que carecía de autorizacións legais

A Garda Civil incautou a un veciño de Vigo algo máis dunha ducia de animais disecados sen autorización, entre os que se atopaban varias cabezas de león, de tigre, de oso ou de puma.

O Servizo de Protección da Natureza (Seprona) da Garda Civil investiga a este home de Vigo como suposto autor dun delito contra a flora e a fauna. Ademais, formulouse unha denuncia administrativa por unha posible infracción de contrabando.

Dentro do marco de actividades programadas a nivel estatal para controlar o cumprimento da normativa que regula o Comercio internacional de especies ameazadas de flora e fauna silvestres (CITES), o Seprona da Garda Civil, co apoio da Patrulla Fiscal e Fronteiras de Vigo, incautouse de 15 exemplares disecados de aves silvestres e mamíferos.

As especies foron intervidas por carecer das preceptivas autorizacións e certificacións, que acreditasen a súa legal tenencia e a súa procedencia.

Entre os animais incautados localizouse un exemplar de azor que se atopa en réxime de protección especial, varias cabezas de león, tigre, oso e puma, así como a cornamenta de varios antílopes.

Todos os animais intervidos quedaron depositados a disposición xudicial nas dependencias do Seprona da Garda Civil de Vigo.