Tentan resolver o misterio dos debuxos aparecidos na igrexa de Santa Clara en Santiago
Os investigadores Miguel Taín Guzmán e José Calvo López analizan nun libro estes debuxos do século XVIII achados no pavimento deste templo.
Por E.P. | SANTIAGO DE COMPOSTELA | 13/11/2018 | Actualizada ás 11:48
O Consorcio de Santiago e a editorial Guiverny acaban de publicar 'As monteas do convento de Santa Clara de Santiago de Compostela', unha obra do historiador Miguel Taín Guzmán e do arquitecto José Calvo López na que se analizan os debuxos do século XVIII achados no pavimento da igrexa deste convento.
O libro preséntase este mércores na Fundación Torrente Ballester, nun acto no que, ademais dos autores, espérase que acudan o alcalde de Santiago, Martiño Noriega, a xerente do Consorcio, Belén Hernández, o responsable de Publicacións do organismo, Juan Conde, e Belén Fortes, da editorial Guiverny.
En 2014, o Consorcio de Santiago retirou a tarima de madeira que forma a capa superior do pavimento da igrexa do convento de Santa Clara, debido ao seu mal estado de conservación, para renovala.
Naquel momento observouse, baixo a tarima, unha gran cantidade de trazados inscritos sobre as lousas de granito que constitúen a base do pavimento. Trátase de monteas, debuxos gravados na pedra que servían de guía aos canteiros no proceso de construción. Unha vez analizados, descubriuse que teñen un elevado valor histórico, artístico e patrimonial.
