Peche en Vigo dos traballadores da 'zona azul' na Casa do Concello para pedir a "intervención" do servizo
O goberno vigués apostou varios axentes da Policía Local na porta principal das instalacións municipais.
Por E.P. | VIGO | 15/11/2018 | Actualizada ás 19:05
Os traballadores da empresa Dornier, concesionaria en Vigo do servizo de estacionamento regulado ('zona azul'), pecháronse no Concello olívico este xoves ao coñecer que a Xunta de Goberno Local non tratou, como lles tiñan trasladado, a resolución do contrato coa empresa e a intervención do servizo, como levan reclamando durante 77 días de folga.
"Contabamos con que a intervención se tratara na Xunta de Goberno ordinaria ou extraordinaria de hoxe", manifestou Julio Fernández Comesaña, portavoz dos traballadores. "Queremos que se proceda á intervención do servizo para poñernos a traballar. Suspenderiamos a folga e traballariamos ata que se resolva o expediente", engadiu.
Desde este mediodía permanecen pechados en dependencias do servizo de Tráfico, no edificio do Concello. Segundo informaron, en total hai 32 persoas alí concentradas, 29 deles traballadores da ORA e o resto representantes sindicais, e todos foron identificados pola Policía Local de Vigo.
O portavoz dos traballadores trasladou s por teléfono --non se permitiu o acceso da prensa ao Concello-- que a súa "previsión" é manter o peche "ata que se resolva a intervención" de Dornier. "Só queremos que nos dean un papel que diga que a empresa está intervida e poñémonos a disposición do Concello. A nosa colaboración é máxima", sostivo.
Segundo estes traballadores, o concelleiro de Seguridade, Carlos López Font, aseguráralles que o seu caso se trataría este xoves na Xunta de Goberno. Pero non foi así e, despois de darlles "unha marxe", os empregados da ORA celebraron unha asemblea que desembocou nun apoio unánime ao peche en dependencias municipais.
Pola súa banda, o portavoz municipal de Marea de Vigo, Rubén Pérez, que xa tentara, sen éxito, reunirse cos traballadores no seu despacho na mañá deste xoves, levoulles "comida" e "auga", pois todo apunta a que pasarán a noite pechados.
Debido a este peche, o goberno municipal adoptou varias medidas de seguridade, como apostar a varios axentes da Policía Local na porta principal do Consistorio, que impediron o paso a calquera persona que non tivese autorización expresa para acceder, incluídos aos xornalistas.
