Concentración en Santiago contra a mina de Touro-O Pino, a "ameaza dun novo 'Prestige"

Veciños de Touro, O Pino e de concellos da Ría de Arousa, avisan da ameaza da explotación para pesca, gando e para o Camiño de Santiago.

Por Europa Press / Redacción | SANTIAGO DE COMPOSTELA | 18/11/2018 | Actualizada ás 14:03

Comparte esta noticia

Decenas de persoas participaron na concentración convocada pola Plataforma Veciñal Mina Touro O Pino Non, este domingo na Alameda de Santiago, para reiterar o seu rexeitamento ao proxecto mineiro que pretende pór en marcha Cobre San Rafael, pois a "contaminación" na zona constitúe a "ameaza dun novo 'Prestige" para o río Ulla e a ría de Arousa.

Concentración contra a Mina de Touro-O Pino en Santiago
Concentración contra a Mina de Touro-O Pino en Santiago | Fonte: Europa Press

Así o aseverou o membro da Plataforma Obdulia Lareo, quen asegurou que a actividade extractiva afecta os terreos "agrícolas, gandeiras e forestais" dos municipios, así como ao sector turístico, xa que o proxecto se sitúa "a 800 metros" do Camiño Francés ao seu paso polo Pino.

En canto á ría de Arousa, apuntou que esta "ameaza" a representan as balsas de lodos tóxicos "da altura das torres da Catedral de Santiago", pois no proxecto "non hai nada que prevexa" posibles fisuras nas mesmas. "Sen unha protección suficiente para que iso non rompa, iría directamente á zona de vivendas e aos afluentes do río Ulla" para logo terminar na ría de Arousa, lamentou Lareo.

"NON O CREMOS"

A actividade mineira en Touro e O Pino levaba décadas paralizada ata que Cobre San Rafael presentou un proxecto de reapertura da canteira que inclúe a restauración da zona afectada. Con todo, a Plataforma Veciñal "non o cre".

"Como imos crer que o que non se restaurou en 30 anos, teña que vir outra mina para restaurala? Non nos poden vender a moto", cuestionou Lareo, quen rexeita que esta rehabilitación "dentro de 15 anos" compense a "ameaza" que supón continuar coa actividade extractiva.

A concentración, á que acudiu o concelleiro de Espazos Cidadáns do Concello de Santiago, tivo lugar na Alameda compostelá, xusto debaixo dunha pancarta contra a mina "que estará aí ata que a Xunta emita un 'non' definitivo a este proxecto", tal e como advertiu a Plataforma.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta