O principal problema do profesorado nas aulas é a ansiedade
Case 120 docentes contactaron o pasado curso co defensor do profesor de ANPEO. 77% eran de secundaria, un 51% deles presentaban ansiedade e no 34% dos casos tiñan problemas para dar clase.
Por Europa Press / Redacción | Santiago de Compostela | 21/11/2018 | Actualizada ás 14:13
Un total de 117 docentes contactaron durante o curso 2017/2018 co servizo de defensor do profesor do sindicato ANPE, que reclama á Administración "formación específica" para facer fronte á conflitividade nas aulas.
Aínda que admite que o índice de conflitividade é "relativamente moi baixo" en Galicia en comparación con outras comunidades, o presidente de ANPE, Julio Díaz Escolante, mostrou este mércores "preocupación" ante unha evolución que leva á do profesor a converterse nunha "profesión de risco".
Por iso, reclamou facer "fronte común" ante problemas relativos aos mozos e que vinculou coa situación familiar e doméstica. O xoves pola tarde, ás 18,30 horas en Santiago, o sindicato reunirase coa conselleira de Educación, á que trasladará esta e outras demandas, como a relativa ao soldo de profesores, porque "o prestixio do profesorado tamén vén por aí".
Xunto a el, o secretario de organización da central, Julio Cesar Trashorras, destacou que o defensor do profesor disposto por ANPE en abril de 2006 acumula desde entón un total de 1.946 chamadas. Os problemas, segundo explicou, agrúpanse, por unha banda, nos que teñen que ver co ritmo da clase e os alumnos, que "acaban estendéndose cos pais" dos estudantes; e, por outro, nos derivados de dinámicas laborais e asuntos cos compañeiros e os equipos directivos, que van "en aumento".
INFORME 2017-2018
O informe do curso 2017-2018 recolle que 117 profesores que contactaron co servizo, un 77% deles de secundaria, un 19% de primaria, o 3% de ciclos formativos e o 1% restante, para adultos.
O 51% presentaba ansiedade, a 21% depresión, o 13% estaba en baixa laboral e o 15% restante non tiña problemas anímicos. En canto ao motivo da chamada, destaca o 34% correspondente a problemas para dar clase, pero tamén o 18% de acoso, insultos e ameazas de pais. A continuación figuran as faltas de respecto, cun 15%, e problemas administrativos coa dirección, con outro 6%.
Por parte do defensor, as actuacións concéntranse entre as que precisaron só de apoio psicolóxico, o 41%, e as de información telefónica da asesoría xurídica, o 36%.
ANPE chama a atención e pon en relación estes datos cos de expedientes a menores e tamén coas cifras de Fiscalía de infraccións penais. Respecto diso, lembra que "o colegueo non funciona" na educación e destaca que a súa organización desenvolverá unhas xornadas o sábado nas que participará o xuíz José Antonio Vázquez Taín precisamente para avanzar na formación neste ámbito.
