Podemos domina a lista alternativa ao Consello de En Marea

O sector crítico coa actual dirección de En Marea, agrupado na chamada Mesa da Confluencia, alcanzou un acordo para presentar unha única lista nas eleccións internas do partido instrumental que estará encabezada por un candidato de consenso, o exdeputado nas Cortes David Bruzos. Unha lista que dominará Podemos.

No lado contrario, os deputados Davide Rodríguez, Pancho Casal e Paula Verao acompañan a Villares na súa lista que está conformada, principalmente, por xente das mareas municipalistas, plataformas como SOS Sanidade, Cerna ou críticos de Anova.

Após manter conversacións mantidas ao longo da última semana, a última hora deste venres, día no que finalizaba o prazo de rexistro de candidaturas, pechouse un acordo entre Podemos, EU, Anova e as mareas de Santiago, A Coruña e Ferrol; que se reparten os postos na lista para as eleccións internas que se celebrarán a primeira fin de semana de decembro.

Membros de Podemos Galicia, cuxa dirección acordou a pasada semana implicarse activamente no funcionamento do partido instrumental, o que lles levou a promover unha campaña entre os seus militantes que se inscribisen en En Marea, copan sete dos postos de saída da lista. Catro son para Esquerda Unida, os mesmos que para Anova, mentres que as mareas municipalistas de Santiago, A Coruña e Ferrol repártense tres.

O exparlamentario ourensán David Bruzos encabeza a lista dos críticos, que aspiran a desbancar a Luís Villares e os seus afíns da dirección do partido instrumental. O número dous da lista é para Oriana Méndez, militante de Anova e membro de Marea Vigo; seguida por Xan Xove, de Marea Atlántica, e Saínza Ruiz, de Esquerda Unida e Ferrol en Común.

No cinco figura Iván Rodríguez, tamén de Anova; mentres que o tres seguintes postos na lista son para membros de Podemos Galicia: Isabel Faraldo, o deputado no Parlamento galego Marcos Cal e Sigrid Campo.

René Gambilla (EU) ocupa o noveno lugar, Gladys Afosno (Anova), o décimo; André Seoane (Compostela Aberta), o décimo primeiro; a deputada Julia Torregrosa (Podemos), o décimo segundo; Borja San Ramón (Podemos); o décimo terceiro e Loreto Taibo de EU, o décimo cuarto.

Completan o vinte primeiros nomes da candidatura: Pedro Castro, Ledicia Piñeiro (Ourense en Común), Guillermo Crego (EU), Xiana López (Ferrol en Común/Anova), Víctor Ferreiro (Ourense en Común/Podemos) e Sara Outeiral (Nós Pobra/Podemos).

DAVID BRUZOS

David Bruzos (Ourense, 1979) pertence á contorna de Ourense en Común, candidatura municipalista que axudou a promover en 2015. En decembro dese mesmo ano encabezou a lista da coalición En Marea pola provincia de Ourense nas eleccións xerais, converténdose en deputado durante a curta lexislatura que derivou nunha nova convocatoria electoral medio ano máis tarde.

A caída de case 6.000 votos nas eleccións de xuño de 2016 respecto de decembro de 2015 fixo que Bruzos perdese a súa acta de deputado e se reincorporase ao seu posto de profesor nun instituto de secundaria ourensán.

Desde entón pasou a un segundo plano no espazo político de En Marea. Agora, o seu nome suscitou consenso entre os partidos e mareas que conforman o sector crítico do partido instrumental, que aspiran a facerse co control de En Marea nas eleccións internas da primeira fin de semana de decembro.

CENSO

Así as cousas, a nova composición do Consello das Mareas sairá das listas dos críticos e da dirección saínte, encabezada por Luís Villares, xa que ao peche do prazo de presentación de candidaturas foron as únicas en rexistrase nun proceso no que están chamados a participar os máis de 4.000 inscritos do partido instrumental.

O censo para poder votar no proceso tamén quedou pechado á medianoite deste venres. Así, segundo figura na web de En Marea, un total de 4.388 persoas formalizaron a súa inscrición no partido instrumental. Con todo, este número podería variar, xa que as inscricións deben ser verificadas e as recibidas a última hora incorporaríanse nos próximos días.