Por Europa Press / Redacción | SANTIAGO DE COMPOSTELA | 27/11/2018 | Actualizada ás 18:30
A Dirección xeral de Emerxencias e Interior da Vicepresidencia da Xunta activou a alerta laranxa por un temporal costeiro que empeza este mércores, día 28 de novembro, nas provincias da Coruña e Pontevedra.
Segundo a información da Axencia Estatal de Meteoroloxía (Aemet), a partir do mediodía deste mércores na Coruña e das últimas horas da tarde en Pontevedra, espérase mar combinado do oeste, con ondas de entre o cinco e seis metros.
Debido a este fenómeno meteorolóxico que afectará a todo o litoral, a Xunta aconsella a suspensión das actividades pesqueiras e marisqueiras como medida preventiva. Tamén recomenda que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
Así mesmo, lembra que os portos constitúen espazos de risco ante a alerta. Nestas contornas, débense evitar os percorridos polas instalacións de especial perigo, así como os percorridos en vehículo por zonas próximas e aparcar nas dársenas.
A Xunta tamén pide non camiñar polas proximidades dos edificios portuarios, guindastres ou outras edificacións que polas súas características poidan sufrir desprendementos nas súas estruturas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.