Por Europa Press / Redacción | SANTIAGO DE COMPOSTELA | 29/11/2018 | Actualizada ás 19:52
O alcalde de Santiago, Martiño Noriega, arroupou á candidatura que encabeza David Bruzos ao Consello das Mareas nun acto celebrado en Santiago de Compostela, onde lamentou que a dirección de Luís Villares publicase en plena campaña que determinados deputados non cumpren coas súas obrigas económicas co partido polo que foron electos.
"Non esperaba determinadas dinámicas de vella política na campaña de En Marea. Paréceme que este tipo de filtracións o que pretenden é agudizar contradicións do espazo que si que existen no canto de positivizar o que nos une, que é moito máis que o que nos separa", sinalou Noriega.
O alcade de Compostela destacou o "carácter integrador" de Bruzos e a súa candidatura, apoiada polo propio rexedor e Compostela Aberta, marea municipalista que iniciou os movementos que derivaron na creación desta lista, apoiada polo resto de mareas das cidades e os partidos Anova, EU e Podemos.
"El (Bruzos) quere construír mandando unha mensaxe de que aquí non sobra ninguén", apuntou, para logo facer fincapé en que a lista 'Entre todas' "xa está a xestionar o día despois" do proceso. Ademais, reivindica que a candidatura que Bruzos encabeza non pon sobre a mesa "un debate nominal, nin está a pór en cuestión liderados tan marcados como o que poida ter Luís (Villares)".
"CÚPULAS"
Así mesmo, rexeita a visión que traslada a candidatura que lidera o actual portavoz, Villares, que asegura que o triunfo de 'Entre Todas' suporía entregar En Marea ás "cúpulas" dos partidos e, por tanto, traizoar a configuración do partido instrumental como espazo de adscrición individual.
"Pódese construír un espazo como En Marea sen corresponsabilizar aos que participan nela desde o principio? Podemos prescindir de todo ese capital político? Eu creo que non, non podemos prescindir diso, aquí non sobra ninguén", resolveu.
Martiño Noriega e David Bruzos participaron na tarde noite deste xoves nun acto celebrado nun establecemento hostaleiro da Praza da Quintana, até onde se desprazaron outros membros do espazo político, como o portavoz nacional de Anova, Antón Sánchez, a concelleira compostelá Branca Novoneyra ou a deputada no Parlamento Luca Chao.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.