A firma de hipotecas sobre vivendas aumentou un 3,8% en Galicia en setembro
Continúan en terreo positivo após a baixada experimentada en xuño
Por E.P. | SANTIAGO DE COMPOSTELA | 30/11/2018 | Actualizada ás 11:00
O número de hipotecas constituídas sobre vivendas inscritas nos rexistros da propiedade situouse en 996 en setembro en Galicia, un 3,8% máis que no mesmo mes de 2017, segundo os datos que publica este venres o Instituto Nacional de Estatística (INE).
Este incremento é sensiblemente inferior ao aumento do 9,5% de media en España. En setembro catro autonomías rexistran baixadas e a subida galega sitúase como a menor entre as comunidades que experimentan crecemento.
De acordo cos datos do INE e en comparación co mesmo mes dun ano antes, rexístrase unha pequena caída, do -0,6%. O capital prestado en setembro ascendeu a 103,3 millóns de euros, o que supón un 14,8% máis que no mesmo mes dun ano antes e un 8,9% máis que en agosto.
PREDIOS
En total, a Comunidade galega rexistrou en setembro 1.481 hipotecas sobre predios rústicos e urbanos, por 151,8 millóns de euros. As constituídas sobre rústicos, 64, supuxeron 7,7 millóns. En canto ás urbanas, 1.417, tiveron un capital de 144 millóns.
Doutra banda, houbo 1.699 cancelacións de hipotecas: 51 que afectan a predios rústicos, 1.147 a vivendas, 10 a solares e 491 a outras urbanas. Case todas (1.577) tiveron que ver con operacións subscritas con bancos.
Por último, houbo 183 cambios rexistrais: 170 renovacións, cinco subrogaciones do debedor e oito do acredor. Por natureza do predio, as modificacións correspondéronse fundamentalmente con urbanos (174), 95 delas foron en vivendas e nove en rústicos.
