Por Europa Press / Redacción | Santiago de Compostela | 30/11/2018 | Actualizada ás 18:34
En Marea reclama "aproveitar o horizonte que se abre" coa eventual inclusión da conexión en tren entre Vigo e Porto no corredor Atlántico. Ademais, pide actuacións "inmediatas" de Xunta e Goberno central para acompañar este feito, como a conexión ferroviaria dos portos e unha política coordinada neste ámbito.
O viceportavoz da formación, Antón Sánchez, chama a atención sobre a "boa noticia" que se produciu no Parlamento europeo o pasado día 22, pola aprobación dentro da comisión de transportes da inclusión da conexión na rede básica do corredor. Esta liña está agora mesmo fose do corredor Atlántico, como lembrou a Comisión Europea nunha resposta ao Eixo Atlántico. Con todo, o visto e prace en comisión "abre" ese "horizonte" de inclusión.
Sánchez espera que esa incorporación "veña acompañada de actuacións urxentes" do Executivo autonómico "en coordinación" co central. "Aínda que até agora a Xunta estivo ausente neste asunto, agora debe aproveitar o horizonte que se abre na vertebración das relacións entre Galicia e Portugal", subliña o viceportavoz de En Marea. Valora ademais "a oportunidade que suporá" ao acceder a liñas de financiamento e engade que a inclusión debe "vir acompañada de accións concretas dos gobernos galego e español para propor un plan estratéxico de actuacións para aproveitala".
CONEXIÓN CO SUR
Neste sentido, márcase "obxectivos como a imprescindible conexión ferroviaria dos portos galegos, que xunto cunha política portuaria coordinada incrementará a súa competitividade, a modernización da conexión de Galicia e Portugal e o desenvolvemento global do eixo atlántico".
Isto, augura, "abrirá oportunidades até agora impracticables para Galicia de conexión co sur da Península sen a obrigatoriedade de pasar por Madrid, abandonando un modelo radial ineficiente para as prioridades e a situación propia do noso país".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.