Pablo Iglesias esixe ao Goberno que non deixe "tirados" aos traballadores de Alcoa

O secretario xeral de Podemos, Pablo Iglesias, instou ao Goberno a "non deixar tirados aos traballadores" e a "intervir" as fábricas da Coruña e Avilés (Asturias) para "protexer o sector industrial", en liña coas demandas do comité de empresa coruñés.

Fíxoo coincidindo cun encontro celebrado, sen convocatoria previa aos medios de comunicación, cos traballadores da planta da Coruña. A el, asistiron tamén representantes de En Marea no Congreso como Yolanda Díaz e Antón Gómez-Reino ou no Parlamento galego como Manuel Lago.

En declaracións aos xornalistas, Pablo Iglesias manifestou que os traballadores "están a dar un exemplo do que é defender a democracia". "Sen defender a industria, non hai patria para ninguén", insistiu ao demandar medidas para garantir estes empregos. Por outra banda, manifestou que o Goberno "ten a obrigación de facer o mesmo que están a facer outros países como Italia ou Alemaña que é protexer o seu sector industrial".

PROTEXER O SECTOR INDUSTRIAL

"Ten que intervir para protexer o seu sector industrial cumprindo o que di a Constitución", sinalou en coincidencia coa demanda do comité de empresa da Coruña, que expuxo intervir as fábricas afectadas polo peche aplicando o artigo 128 punto 2 da Carta Magna. Por outra banda, Pablo Iglesias rexeitou o argumento da falta de rendibilidade e incidiu en que hai "demanda de aluminio", mentres instou ao presidente do Goberno, Pedro Sánchez, a recibir aos traballadores.

"Por dignidade democrática", manifestou o dirixente de Podemos, para quen non hai "escusa" para non recibir aos traballadores. "Un goberno responsable debe protexer ao sector industrial e aos traballadores", recalcou.