Por Europa Press / Redacción | A CORUÑA | 05/12/2018 | Actualizada ás 17:46
O presidente do comité de empresa da fábrica de Alcoa na Coruña, Juan Carlos López Corbacho, instou ao Goberno a "pasar á acción" ao ratificar a empresa a súa decisión de manter o expediente de regulación de emprego (ERE) extintivo para esta planta e a de Avilés (Asturias).
Após a reunión celebrada este martes en Madrid despois da constitución da mesa negociadora, Corbacho dixo que o encontro estivo "dentro do esperado" coa empresa reiterando a súa decisión de aplicar o ERE extintivo, aínda que disposta a ampliar até o 15 de xaneiro as negociacións se fose necesario.
Fronte a iso, segundo explicou o presidente do comité de empresa da Coruña, os representantes sindicais defenderon que o proceso é "nulo" e que, en todo caso, debería haber unha negociación para cada fábrica. Tamén pediron "negociar sen presión", en alusión ás datas para que conclúan as negociacións.
"Para que a mesa estatal —integrada polo Goberno, os concellos da Coruña e Avilés e as comunidades autónomas de Asturias e Galicia— busque alternativas dun comprador", engadiu.
POSTURA DO GOBERNO
Ante a postura da empresa, Corbacho asegurou que só hai dúas formas de parar o ERE extintivo: "Ou que a empresa o retire ou que o Goberno interveña". "Que tome cartas no asunto, porque non está a presionar a empresa como debe", lamentou sobre o posicionamento do Executivo central.
"Non ten desculpas", expuxo tamén o presidente do comité de empresa da Coruña en alusión ás declaracións institucionais aprobadas en defensa do mantemento do emprego tanto en Galicia como en Asturias e no Congreso e o Senado. Mentres, confirmou que convocarán un novo calendario de mobilizacións, aínda por concretar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.