Así debuxa o CIS a situación política en Galicia
Se houbera eleccións xerais, o PSOE gañaría e Ciudadanos quedaría por riba de En Marea. A enquisa ten en conta a Vox pero non ao BNG que estaría no apartado de "outros" partidos.
Por Galicia Confidencial | Compostela | 06/12/2018 | Actualizada ás 14:31
O PSOE gañaría as eleccións xerais en Galicia cun 20,9% dos votos. Iso é, cando menos, o que di a última enquisa do CIS que publicaba este mércores o barómetro de novembro logo do fiasco que os socialistas e os populares levaron en Andalucía.
Os que votarían ao PSOE e os que aíndan non saben a quen votarían case que empatan, cun 20,9% e un 19,9%, respectivamente. Detrás xa se situaría o PP, cun 16,6% dos votos e como terceira forza, Ciudadanos, cun 11,2%.
De feito, o dato máis significativo deste novo barómetro é que o partido de Albert Rivera, que nas anteriores proxeccións estaba sempre como cuarta forza, posicionase xa por riba de En Marea que quedaría con tan só un 8,7% dos votos. A bastención situariase nun 10,7%.
A última enquisa do CIS tamén deixa datos curiosos como a porcentaxe de votos que obtería Vox, o partido de ultradereita que entrou con forza na Cámara andaluza con 12 escanos e 400.000 votos. En Galicia, segundo este barómetro, quedaría cun 1% dos votos. O BNG non aparece e habería que interpretar que se atopa no apartado “Outro”, que está no 1,5% dos votos, moi próximo a formación populista e por detrás dos votos en branco que sumarían un 4,1%.
Esta enquisa, con todo, foi feita antes das eleccións andaluzas e antes dos grandes problemas e divisións internas que atravesa En Marea. Non obstante, como aconteceu en anteriores ocasións, o novo estudo do CIS foi duramente criticado polos partidos da oposición.
