O hospital privado Povisa ameaza co concurso de acredores e insiste en culpar o Sergas

A deputada de En Marea Eva Solla instou este venres ao Sergas a que "garanta" a asistencia sanitaria á poboación da área de Vigo que pertence á cota do Hospital Povisa, que continúa en conversas co ente público para renegociar o seu concerto e que, se non logra un acordo antes do próximo 28 de decembro, entrará en concurso de acredores.

Neste sentido, a xerente de Povisa, María Luisa Brandt, comunicou esta semana aos traballadores do centro privado que a "tensa situación de tesouraría" unida á "inminente finalización do prazo legal para entrar en situación concursal" provocan que "a próxima semana sexa decisiva para alcanzar ou non unha solución definitiva".

Na carta asinada por Brandt apúntase que "o Sergas continúa sen dar solución ao grave problema de tesouraría que estamos a atravesar pola súa causa e séguese mantendo un amplo desequilibrio entre os ingresos e os gastos derivados da actividade que realizamos para eles que nos impide alcanzar un punto de equilibrio, aínda contando cos beneficios da actividade privada".

Eva Solla manifestou que a Xunta de Galicia "debe actuar" para que a poboación non quede "desprovista de atención sanitaria" e censurou que a Administración "mire para outro lado" cando, nas súas palabras, "o problema está a piques de estoupar".

"Queremos denunciar a chantaxe perpetua da empresa, utilizando os seus traballadores como moeda de cambio para obter máis recursos públicos sen importarlle nin as condicións laborais nin a asistencia das 137.000 persoas que dependen deste hospital privado", sostivo a deputada Eva Solla.

PAGOS "CONDICIONADOS"

Pola súa banda, a xerente de Povisa, María Luisa Brandt, trasladou na súa carta aos traballadores do hospital privado que "non se produciu ningún avance positivo" nas negociacións que a empresa mantén co Sergas.

Na misiva, Brandt explica que "as maiores tensións económicas" que está a atravesar Povisa débense á "falta de pagamentos por parte do Sergas das novidades terapéuticas xurdidas con posterioridade ao concerto e administradas a pacientes Sergas coa súa previa autorización".

A xerente cifra "nun total de 15 millóns de euros" o desembolso do centro privado para sufragar estes tratamentos e insiste en que Povisa "aínda non recibiu en contraprestación nin un só euro do Sergas por este concepto".

É por isto que a empresa informa aos seus traballadores de que a súa "capacidade para facer fronte aos pagos correntes a curto prazo" está "condicionada" polas "cantidades debidas polo Sergas".

POSTOS DE TRABALLO

Por outra banda, Solla lembrou que En Marea ve "necesario" que se manteñan os postos de traballo en Povisa e criticou que "parece" que o Sergas non teña "ningún tipo de proposta para liquidar a situación".

En Marea tivo acceso ás contas da empresa despois de reclamalas no Rexistro Mercantil e apuntan que, "contrariamente ao que argumentaba a dirección" do hospital privado, as contas "non evidencian problemas de liquidez a curto prazo".

Por este motivo, o partido instou á Xunta a "non ceder ás inadmisibles chantaxes" de Povisa, pois considera que non "afronta dificultades para abonar os salarios do seu cadro". Segundo avanzou a deputada, En Marea volverá levar ao Parlamento de Galicia a situación do hospital privado de Vigo.