Reivindican un "tren de calidade" para a área metropolitana da Coruña

A Plataforma pola Defensa do Tren A Coruña e As Mariñas convoca un acto reinvindicativo para demandar a implantación dun tren de cercanías na comarca da Coruña e a mellora da liña A Coruña–Ferrol, A Coruña-Lugo e Ferrol-Ribadeo. A acción, prevista para o domingo 16, consistirá nunha viaxe en tren ata Betanzos, que partirá da Coruña ás 10.50h e de Ferrol ás 8.54h. Na estación da Coruña realizarán unha concentración ás 10.30h, xusto antes de emprender o traxecto. A esta viaxe convidaron a todos os concellos polos que pasa o tren entre A Coruña, Ferrol e Ribadeo. É un xeito, din, de involucralos tamén nunha demandas que “son fundamentais para a mobilidade de toda a zona”.

Tren de proximidade

O acto en Betanzos consistirá nunha marcha entre a estación e a praza dos Irmáns Naveira. Alí haberá, ás 12.00h, un acto reivindicativo onde lerán un manifesto e tamén contarán cunha actuación musical. Para a Plataforma, o abandono da liña ferroviaria é un “despilfarro de cartos públicos porque podería dar un servizo de calidade a máis de 600.000 persoas, reducindo o custe medioambiental dos desprazamentos por estrada en vehículo privado”. A Plataforma reclama arranxar e mellorar as liñas existentes, electrificalas, engadir ou reabrir apeadeiros, incrementar as frecuencias e adaptar os horarios, o cal permitiría contar cun servizo de ferrocarril de calidade e sostible.

A entidade comenta que seguirán desenvolvendo accións para dar a coñecer á xente as posibilidades que ten o tren, unha vez que as infraestruturas xa están feitas. Piden a implicación de todas as organizacións políticas, sociais e sindicais, así como dos medios de comunicación, para que lles dean visibilidade ás súas demandas.