O Consello das Mareas tentará o sábado unha solución que permita "incrementar as garantías" nas votacións
Así, a dirección confía en que a Comisión de garantías poida "levantar a maior parte dos reparos presentados no seu día".
Por Europa Press / Redacción | SANTIAGO DE COMPOSTELA | 13/12/2018 | Actualizada ás 21:10
A coordinadora de En Marea convocou este xoves ao Consello das Mareas, máximo órgano político da organización, para abordar o vindeiro sábado "unha serie de solucións técnicas" orientadas a "incrementar as garantías" nas votacións e "cumprir" os "requisitos apuntados no seu día pola Comisión de ética e garantías", que motivaron a suspensión dos comicios o pasado 1 de decembro.
A través dun comunicado, En Marea indicou que a dirección "debaterá e decidirá" sobre a implementación de medidas de seguridade relativas á propia base de datos do censo, a votación e a verificación externa do seu proceso, a confirmación do voto emitido, así como a incorporación da papeleta completa co nome das candidaturas.
Con estas propostas, a dirección confía en que a Comisión de garantías poida "levantar a maior parte dos reparos presentados no seu día" e o Comité electoral poderá marcar, "de forma inminente", unha nova data de votación.
