Pablo Casado, aos militantes galegos: "Somos os únicos que defenden a Constitución e o único partido de centro dereita"

O presidente do PP, Pablo Casado, reivindicou a esta formación como un partido "preparado" para recuperar gobernos nas eleccións municipais e autonómicas de 2019 e o único de "centro dereita" en España. Para logralo, dixo que a próxima convención desta formación —que se celebrará en xaneiro— servirá para presentar un PP, "nado para servir á Constitución, que agora por desgraza só nós defendemos", asegurou; pero tamén para expor uns programas municipais "que sexan un contrato cos españois".

"E con iso poderemos recuperar gobernos, para logo traballar e volver ao goberno de España", dixo na xunta provincial do PP da Coruña, que contou coa presenza do presidente do PPdeG e titular do Executivo galego, Alberto Núñez Feijóo; o presidente provincial do PP da Coruña, Diego Calvo, ademais de alcaldes e candidatos nas próximas eleccións municipais en Galicia, entre outros asistentes.

Nun discurso con eloxios á xestión realizada polos alcaldes e alcaldesas do PP, Casado apelou tamén a gobernar nas sete grandes cidades galegas "para ter eses bos indicadores que ben merece esta terra", dixo.

Así, no seu discurso, insistiu en que, cando accedeu á presidencia do PP, xa expuxo que quería facer un partido "moi parecido ao de Galicia". "De base, moi pegado á terra, de historia, pero que mira ao futuro", engadiu.

Na mesma liña, apelou a "revalidar" unha proposta programática como a de Feijóo en Galicia, "de principio e de ideas", para recuperar a base electoral do PP. "A sociedade española necesita claras referencias", insistiu ante os militantes, aos que instou a funcionar a través do "boca a boca" e "pegar a orella ao chan" para recuperar os gobernos onde o PP os perdese.

UN PP DE "MAIORÍAS"

Mentres, o presidente do PPdeG, Alberto Núñez Feijóo, definiu o PP como a formación "das maiorías". "Onde gobernou contribuíu ao progreso e onde non gobernou, á democracia", sinalou no caso do País Vasco.

Se Casado tivo palabras de recordo para o fundador do PP, Manuel Fraga, tamén o fixo Feijóo reivindicando a súa xestión e a de Mariano Rajoy no goberno central. "Sentímonos orgullosos do presidente Fraga e do presidente Rajoy, claves na democracia española".

"Grazas Casado por estar con Galicia e en Galicia", expuxo antes no inicio do seu discurso nun acto que serviu tamén para arroupar a candidatos tanto da provincia da Coruña como doutras cidades galegas, presentes tamén.

De cara ás próximas eleccións, Feijoo asegurou que os votantes non van atopar noutro partido "o que se busca no PP", entre o que citou a "defensa" da Constitución, do Estado das Autonomías e da "nación española".

Fronte a un PP "unido", dixo que en Galicia hai un PSdeG "que xa non identifican como propio a maioría dos socialistas que tiveron responsabilidade; unhas mareas de Podemos nas que, o sectarismo que aplican a todos os demais, empezan a aplicalo a si mesmos e un BNG pactando cos independentistas vascos e cataláns".

"Galicia é o PP, pero Galicia é España", recalcou nun discurso con varias alusións á situación en Cataluña e con críticas á moción de censura de Pedro Sánchez. "A seguir traballando!", concluíu arengando á militancia de cara ás próximas eleccións municipais.

"A RAIA" AOS "ISMOS"

Pola súa banda, o presidente do PP na provincia da Coruña, Diego Calvo, asegurou que esta formación é "un partido fiable e fiel". "Ao PP, que mantivo a raia a todos eses ismos, non nos gusta o extremismo do populismo nin o rancio nacionalismo".

"En Ferrol nada de nada de nada, en Santiago nin un só día estiveron á altura da capital de Galicia", citou como exemplos da xestión das mareas nas urbes galegas. "Detrás do populismo non hai nada", manifestou en alusión tamén á xestión de Marea Atlántica na cidade herculina.