Caballero achaca a ausencia de médicos ao "fracaso" e á "precariedade" da política sanitaria da Xunta

O secretario xeral do PSdeG, Gonzalo Caballero, denunciou que a ausencia de médicos para facer substitucións en Galicia é consecuencia do "fracaso" da política sanitaria da Xunta e da súa "estratexia de privatizacións e precarización". Aludiu aos contratos "por hora e semanas" que provocaron que "centos de médicos" emigrasen fóra de Galicia.

No acto de presentación da candidata socialista en Mos, Gonzalo Caballero criticou o modelo sanitario da Xunta, ao entender que a dimisión de máis do 80% dos xefes de servizo de Atención Primaria da área de Vigo, que se produciu esta semana, sumada a varias folgas de colectivos sanitarios, confirma o "fracaso da política sanitaria da dereita" e a súa "falta de compromiso cunha sanidade pública, universal e gratuíta".

"Cando agora Feijóo sinala que non hai médicos para dar solución aos problemas da sanidade pública recoñece o fracaso da política sanitaria do PP, porque centos de profesionais abandonaron Galicia polas condicións de precariedade, de contratos continuos de días e de horas que lle ofrecía o Sergas", remarcou o líder dos socialistas galegos en resposta a unhas declaracións do presidente.

Nesa intervención, este sábado, Feijóo aseguraba que Galicia "nunca tivo" tantos medios en materia de saúde, aínda que apuntaba, en relación aos problemas que denuncia o sector, cara ás carencias na capacidade de formación de persoal, porque o que necesita a comunidade "son médicos".

Para Gonzalo Caballero, Feijóo "ten que recoñecer o seu fracaso", "deixar de buscar escusas" e "rectificar" a súa política sanitaria, ademais de "cambiar os responsables", nunha posible referencia ao conselleiro de Sanidade, Jesús Vázquez Almuiña, a quen non citou expresamente.

UNHA  "CONTRACOMISIÓN" SOBRE SANIDADE

O secretario  xeral do PSdeG enlazou as súas críticas coa posta en marcha por parte dos grupos da oposición no Parlamento de Galicia dunha "contracomisión" sobre sanidade. A iniciativa xurdiu despois de que PSdeG, En Marea e BNG decidisen abandonar a comisión de investigación que se puxo en marcha como protesta pola negativa do PP para aceptar a súa lista de comparecentes.

"Mañá no Parlamento galego evidenciaremos como o PP quere evitar deixar falar en sede parlamentaria a aqueles que coñecen os problemas da sanidade galega", ao non permitir intervir aos familiares do home falecido no PAC da Estrada sen que recibise atención médica, asegurou.

A situación da sanidade galega demostra, para Gonzalo Caballero, que "Feijóo está en tempo de desconto, o seu proxecto está esgotado" e que as súas políticas "fracasaron".

Así o manifestou en Mos o líder dos socialistas galegos, onde arroupou á súa candidata ás municipais, Vitoria Alonso, unha "muller nova e preparada, con ganas de darlle un cambio ás políticas municipais do PP".