O Comité Electoral de En Marea denuncia "boicot" de afíns a Villares e desautoriza que Garantías suspenda a tres membros
A coordinadora impide que o comité electoral celebre unha rolda de prensa na sede de En Marea.
Por Europa Press / Redacción | SANTIAGO DE COMPOSTELA | 18/12/2018 | Actualizada ás 20:30
O comité electoral das primarias de En Marea, con maioría do sector crítico, denunciou un "boicot" do que culpan a persoas afíns á dirección do partido instrumental que encabeza Luís Villares, á que acusan de querer atrasar 'sine die' a celebración das eleccións internas, que debían celebrarse hai máis de dúas semanas e para as que aínda non hai data.
Catro membros do comité —Sonia Mauriz, Martiño Ramos, Jennifer Merino e Carlos Franco— ofreceron declaracións aos medios na tarde deste martes ás portas da sede de En Marea en Santiago, xa que, segundo relataron, a coordinadora do partido instrumental non lles autorizou a celebrar a rolda de prensa no interior, como xa sucedeu o pasado venres cun membro da Comisión de Garantías.
Alí, Mauriz asegurou que este martes Daniel Conde, membro do comité electoral e afín á dirección, agregou aos tres suplentes da lista ao comité electoral (todos eles tamén do sector de Luís Villares) á canle da aplicación de mensaxería Telegram que o órgano emprega para realizar reunións telemáticas.
Segundo os portavoces do comité, Conde realizou este movemento en cumprimento de forma "unilateral" da resolución ditada polo Comité de Garantías (controlada por afíns á dirección) de suspender ao tres membros do comité electoral acusados de acceder de maneira irregular ao censo.
Con estas tres personas dentro do grupo, segundo a versión expresada por Mauriz, realizouse unha votación "ilegal" que acordaba anunciar a dimisión dos tres cesados por Garantías e suspender a rolda de prensa convocada polo comité para a tarde deste martes.
Horas antes da convocatoria, o correo electrónico oficial do comité remitía aos medios un comunicado que anunciaba as decisións adoptadas. Esta mensaxe foi desmentida minutos despois por varios membros do comité, que aseguraban que a convocatoria aos medios seguían en pé e que os compañeiros non dimitiran, xa que entenden que Garantías non está autorizada a suspendelos da súa actividade.
