O comité de folga de Urxencias do CHUS ven distante a proposta da xerencia dunha persoa de reforzo
O comité reclama que a área de urxencias estea "convenientemente dotada" e piden un "cadro estable" de persoal.
Por Europa Press / Redacción | SANTIAGO DE COMPOSTELA | 19/12/2018 | Actualizada ás 14:38
A xerencia do Hospital Clínico de Santiago de Compostela (CHUS) ofreceu este mércores ao comité de folga de Urxencias unha persona adicional no servizo, unha cuestión que os traballadores ven "aínda distante" das súas reclamacións. Así o confirmou o presidente da Comisión Especializada, Camilo Agulleiro (CIG), despois de que os representantes dos traballadores mantivesen unha reunión coa xerencia á primeira hora deste mércores.
No encontro, dixo, logrouse un "pequeno avance", que os profesionais "valoran", aínda que as propostas "aínda están distantes" e apostan por "seguir negociando". Este avance, apuntou, implica a presenza adicional dunha enfermeira no servizo de Urxencias, unha proposta que se trasladará este venres aos traballadores nunha asemblea extraordinaria convocada para as 12,00 horas.
No entanto, Agulleiro indicou que esta cesión é aínda insuficiente e reclamou unha maior dotación de persoal para a área. Por iso, manteñen a folga que xa entra na súa sexta semana, as concentracións que realizan os luns e a manifestación do día 9 de xaneiro, se antes non se chega a un acordo.
DIFERENZA EN NÚMERO DE PRESENZAS
Camilo Agulleiro explicou que aínda persiste unha "diferenza elevada en canto ao número de presenzas" necesarias con respecto á xerencia, á que reclaman que os espazos de Urxencias estean "convenientemente dotados" de persoal. "Ao longo destes anos se foi aumentando o espazo sen dotalo de persoal", apunta o representante, que pide un "cadro estable" e non "puntual" para as zonas adicionais deste servizo.
Para escenificar a súa protesta, o persoal de Urxencias do CHUS instalou á primeira hora deste mércores no hall do centro hospitalario compostelán unha capela ardente previa ao enterro simbólico do servizo, para o que gardaron ás 12,00 horas un minuto de silencio co obxectivo "renderlle o emotivo e sentida homenaxe que merece".
Ás 18,00 horas, os profesionais en folga darán traslado do "corpo presente" do servizo "á Igrexa de Santa María da Perpetua Paciencia, na parroquia de Urxencias de Adultos", onde se velará e terá lugar "a súa incineración segundo a tradición Celta".
