A Xunta di que nacen máis nenos de familias con poucos ingresos que as que teñen máis poder adquisitivo
“O problema de natalidade en Galicia non é económico”, asegura o presidente galego. A axuda de 1.200 euros por bebé poderase pedir no embarazo e será ampliable ante unha baixada de ingresos.
Por Galicia Confidencial | Compostela | 20/12/2018 | Actualizada ás 17:25
Galicia ten un grave problema demográfico que é asumido por todos os partidos políticos. Con todo, as explicacións para esta situación son moi diversas. A última delas deuna este xoves o presidente da Xunta ao suliñar que as dificultades para ter nenos en Galicia “non son de tipo económico”.
Alberto Núñez Feijóo baseou esta afirmación nas “Tarxeta Benvida” que a Xunta entregou o pasado ano ás familias que tiveron un bebé. O 60% delas foron entregadas a familias con rendas inferiores a 22.000 euros anuais. “Isto indica que o problema da natalidade é moi complezo e que non é exclusivamente económico”, suliñou na rolda de prensa posterior ao Consello da Xunta.
Unha reflexión que o presidente galego fixo tras anunciar que a 'Tarxeta Benvida' --axuda de 100 euros ao mes por nacemento que suma os 1.200 euros anuais-- da Xunta poderase solicitar durante o embarazo e será ampliable para familias que sufran unha baixada de ingresos. Tamén a poderán pedir as retornadas ou fillas de retornadas que teñan fillos con menos dun ano de idade.
NOVIDADES
En concreto, entre as novidades da nova convocatoria, o presidente, Alberto Núñez Feijóo, apuntou que aquelas familias que obtivesen a Tarxeta Benvida en 2018 e que neste ano visen rebaixado o seu nivel de ingresos --porque un dos seus membros estea no paro, por exemplo-- até situarse nos 22.000 euros ou menos, terán dereito á ampliación cando comuniquen o seu cambio de situación.
En total, a Xunta destinará 36 millóns de euros para estas bonos no ano 2019. Este recurso permite atender gastos como como a compra de medicamentos infantís, cueiros, roupa, berces e produtos de hixiene ou farmacéuticos.
Con carácter xeral, cargarase con 1.200 euros distribuídos en dous pagos, un en 2019 e outro en 2020. Todo iso a condición de que a renda familiar anual sexa inferior aos 45.000 euros ou menor de 13.500 eruos per cápita. Desde a posta en marcha desta medida, en 2016, unhas 40.000 'Tarxetas Benvida' chegaron durante o primeiro ano de vida do neno.
