Festa nunha administración de Teo que reparte 6,4 millóns de euros con 16 décimos do 'Gordo'

A administración de lotarías número un de Teo (A Coruña) repartiu un total de 6,4 millóns de euros, ao vender por terminal un total de 16 décimos do número 3.347, premiado co 'Gordo' do Sorteo de Nadal.

O loteiro deste local situado na avenida Montouto, Roberto Quintás, asegurou, que "moita xente", sobre todo veciños, se achegaron na mañá deste sábado para celebrar o premio.

O dono da administración dixo estar "moi contento" por repartir o número 3.347, aínda que non sabía a quen foi parar o 'Gordo', xa que a venda se realizou por terminal.

Esta é "a primeira vez" que neste establecemento de Teo dan un primeiro premio dun sorteo de lotaría, e iso a pesar de que Quintás é dono do local desde hai "só dous anos". Para a celebración, traballadores da administración e veciños brindaron con champaña.

Deste xeito, tampouco sabe se o 3.347 é un décimo "con tradición" na zona, aínda que o certo é que os locais anexos a esta administración número un do municipio contan cun número "similar".