Por Europa Press / Redacción | SANTIAGO DE COMPOSTELA | 25/12/2018 | Actualizada ás 20:05
Traballadores da zona azul de Vigo e as súas familias celebraron a Noiteboa cunha "cea-protesta" ante a árbore de Nadal situada na Porta do Sol da cidade para urxir ao Concello e á empresa concesionaria do servizo unha "solución".
Segundo explicou o portavoz dos empregados, Julio Fernández, os participantes convidaron os viandantes a tomar algo con eles para concienciar os veciños da situación que atravesan.
En concreto, o colectivo esixe que a empresa readmita aos sete traballadores despedidos o pasado 30 de xuño. "A partir de aí estamos dispostos a falar coa empresa, como así lle dixemos en varias mesas de mediación", sinalou.
E é que, fronte a estes despedimentos, os traballadores defenden que se inicie un período de baixas incentivadas, con prexubilacións ou xubilacións a aquelas persoas que así o soliciten.
Ademais, Julio Fernández lamentou que o alcalde, Abel Caballero, aínda non os recibiu para coñecer a súa situación a pesar de que o Concello é "responsable" da situación tendo en conta que, segundo denunciou, adxudicou o contrato da zona azul cun "31% de baixa no custo de persoal".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.