A Audiencia condena a 15 anos e medio de prisión o autor do asasinato na institución Padre Rubinos

A condena inclúe outros sete anos de liberdade vixiad e indemnizacións aos familiares do morto.

Por Europa Press / Redacción | A CORUÑA | 28/12/2018 | Actualizada ás 11:28

Comparte esta noticia

A sección primeira da Audiencia Provincial da Coruña, de acordo co veredicto do Tribunal do Xurado, condenou a quince anos e medio de cárcere e a sete anos de liberdade vixiada ao home que asasinou a outro no exterior da Institución Benéfico Social Padre Rubinos, un crime ocorrido o 8 de xaneiro de 2017.

Institución Benéfico Social Padre Rubinos.
Institución Benéfico Social Padre Rubinos.

Despois de que o xurado popular considerase culpable ao acusado, a Audiencia imponlle agora esta pena ao home como autor dun delito de asasinato con aleivosía.

Así, o fallo considera probado que o home apuñalou mortalmente á vítima na tarde do 8 de xaneiro de 2018, cunha arma branca e de dobre fío que portaba na súa cazadora. A puñalada atravesoulle o corazón, o que lle causou a morte nun curto espazo de tempo.

O crime, estima, realizouse con "aleivosía", dado que o condenado actuou "por sorpresa" e a vítima non tivo a posibilidade de defenderse. "Despois de manter unha conversa co falecido, (o condenado) deuse a volta e fixo simulación de irse, facéndolle crer que abandonaba o lugar, pero virouse de novo repentinamente e, de forma rápida, sacou a arma de entre as súas roupas e cravoulla", relata o tribunal, á vez que destaca que a vítima "non esperaba o ataque e non tivo oportunidade de defenderse".

O ataque produciuse "sen que conste o motivo" e, considera a sala, con "intención de acabar coa vida" do home ou, polo menos, sendo consciente de "risco evidente da súa acción".

ATENUANTE DE ALTERACIÓN PSÍQUICA

No fallo, os maxistrados tiveron en conta a atenuante simple de alteración psíquica, pero rexeitaron, como demandaba a defensa, que o acusado tivese "totalmente anuladas" as capacidades volitivas e intelectivas cando cometeu os feitos.

"Acredítase o trastorno de personalidade e un consumo crónico de bebidas alcohólicas e outras sustancias de abuso, pero o informe forense unicamente estima unha afectación das capacidades intelectivas e volitivas leve", indican na sentenza que, por tanto, considera que, a pesar da alteración, o home era consciente dos seus actos.

Ademais da pena de cárcere, a Audiencia condena ao asasino a indemnizar a cada un do tres fillos menores do falecido na suma de 99.496 euros, a cada un dos pais con 44.220 euros e a cada un dos irmáns do falecido en 16.582 euros.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta