A Xunta patenta unha sonda mecanizada para tomar mostras en silos de millo e de herba

As forraxes dentro dos silos poden perder valores nutricionais para alimentar o gando. Por outra parte, a consellería de Economía abre outra edición de "Galicia Rural Emprende" con catro millóns de euros en axudas.

Por Europa Press / Redacción | SANTIAGO DE COMPOSTELA | 30/12/2018 | Actualizada ás 12:26

Comparte esta noticia

A Consellería do Medio Rural conseguiu unha patente de carácter industrial para unha sonda mecanizada que permite tomar mostras en silos de millo e de herba, un invento orientado a realizar análises nutricionais das forraxes con máis axilidade e menor esforzo.

Vacas nunha granxaa ourensá
Vacas nunha granxaa ourensá

O invento xurdiu despois de que os técnicos do Centro de Investigacións Agrarias de Mabegondo (CIAM), dependente da Axencia Galega de Calidade Alimentaria decidisen probar a creación deste mecanismo. Actualmente, o sistema de toma de mostras nestas superficies faise de xeito manual e en ocasións resulta lento, dificultoso e require dun gran esforzo físico por parte dos operariosque realizan estes controis, subliña Medio Rural.

Moitas das forraxes coas que se alimentan os animais mantéñense en silos, onde a variabilidade do seu valor nutritivo é moi elevada debido a aspectos propios da forraxe, como son o xenotipo, o estado de maduración ou outros valores extrínsecos que teñen que ver principalmente coas condicións do medio e a forma de aproveitamento do cultivo.

Neste sentido, Medio Rural destaca que é necesario levar unha mostraxe previa á apertura dos silos para determinar a calidade da alimentación animal, co fin de permitir a elaboración de racións equilibradas para o gando e optimizar o uso das propias forraxes desde un punto de vista económico e nutricional. Por este motivo, aconséllase realizar estas analíticas en diversos puntos da superficie e en toda a altura da masa da forraxe ensilado, co obxectivo de obter unha mostra representativa da súa calidade e dos seus valores nutricionais.

AXUDAS POR VALOR DE CATRO MILLÓNS DE EUROS

A Consellería de Economía, Emprego e Industria comezará a principios do próximo ano unha nova edición do programa 'Galicia Rural Emprende', que achegará 4 millóns de euros en axudas para ao redor de 70 proxectos de autónomos e emprendedores que mobilizarán investimentos de até 8 millóns de euros e que farán posible a creación de 200 empregos. Nas anteriores convocatorias de 2017 e 2018, o programa impulsou 118 proxectos empresariais de emprendedores e autónomos con axudas de 7 millóns de euros "vinculadas ao compromiso e mantemento" de 285 postos de traballo das devanditas iniciativas.

'Galicia Rural Emprende' trata de impulsar actividades de sectores como o da automoción, téxtil, aeronáutico, químico, ambiental, TIC, audiovisual, pedra natural e industrias creativas, entre outras. O importe mínimo das axudas por beneficiario será de 20.000 euros e as máximas de 70.000 euros. Os investidores que participen nesta liña de apoio económico desenvolverán os seus plans empresariais de negocio en 18 meses e recibirán un adianto do 60 por cento, tras a notificación da resolución e a acreditación do plan.

Con este programa, a Xunta "reforza esta liña de apoio ao emprendimiento" desenvolvida polo Instituto Galego de Promoción Económica (Igape) e cofinanciado polo Fondo Europeo Agrícola de Desenvolvemento Rural (Feader). Segundo a Consellería, o obxectivo desta liña de axudas é "seguir estimulando o tecido empresarial galego e fomentar a xeración de emprego a través do apoio á creación de empresas para actividades non agrícolas en zonas rurais".

Ademais, co mesmo obxectivo pero "sen focalizar a acción no ámbito rural", a Xunta tamén desenvolve, a través do Igape, o programa 'Galicia Emprende', que desde o 2010 facilitou a aprobación de 432 proxectos emprendedores. Nos dous últimos anos, e aínda á espera da resolución da segunda convocatoria do ano 2018, a Xunta concedeu axudas a 269 proxectos a través de ambos os programas, cunha mobilización de preto de 30 millóns de euros.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta