O Concello de Pontevedra estima que a reforma das Piscinas de Campolongo comece en abril

O Concello de Pontevedra e a concesionaria e nova adxudicataria das Piscinas de Campolongo, Serviocio- Be One, manterán este venres unha reunión para concretar o inicio da reforma das instalacións deportivas. O Consistorio espera que a reforma das Piscinas de Campolongo comece en abril.

Segundo informou este mércores en rolda de prensa o portavoz do goberno municipal, Raimundo González, aínda que a data está por fixar, en principio, ambas as partes parecen decantarse para iniciar os traballos no mes de abril e finalizar en setembro, dado que a obra ten un prazo de execución de seis meses.

A empresa gañadora do concurso xa presentou o proxecto de execución que está a ser estudado polo servizo de arquitectura do Concello. Ten un orzamento de 5.140.000 euros, dos cales 4.333.000 euros corresponden á obra civil.

Os servizos de Contratación, Arquitectura e Deportes e a adxudicataria, manterán este encontro para planificar as obras xa que o inicio terá que ser debidamente comunicado tanto aos traballadores das piscinas como aos usuarios.

A superficie do centro pasará de 3.800 a 5.700 metros cadrados, abrindo a planta baixa e a zona de recepción do edificio cara ao paseo que está á beira da igrexa de San José e incorporando unha segunda planta que, na súa superficie, contará con pistas polideportivas.

Ademais, a zona de actividades en seco duplicarase ata os 1.600 metros cadrados e haberá nove salas de fitness, en lugar das catro actuais. As áreas de ximnasio, por outra banda, estarán dotadas de máquinas de última tecnoloxía e conexión a TV e Internet. Tamén se incorporarán e mellorarán servizos como ludoteca, a área de fisioterapia completarase con nutrición, e haberá máis salas para fitness e actividades deportivas pasando de 4 a 9.

Así mesmo, ofrecerase un maior número de actividades deportivas e incorporaranse novos servizos de ludoteca ou expertos en nutrición na área de fisioterapia. Manterase a cafetería, aínda que se reformulará a súa oferta ao público.

O novo contrato, que inclúe unha redución do 2,5% no prezo das tarifas e a ampliación dos horarios de apertura ao público, entrará en vigor o día no que se estreen as novas instalacións. Os postos de traballo actuais, un total de 42, incrementaranse. Outra das melloras que inclúe a oferta de Serviocio, é un investimento de 400.000 euros para novo equipamento deportivo.

Serviocio, que pagará un canon anual de 60.000 euros ao Concello, valora o montante global do contrato nuns 34 millóns de euros a 20 anos, entre este canon, o investimento na remodelación e os gastos de funcionamento. Na xestión da piscina, Serviocio propón un incremento de rúas para actividades programadas polo Consistorio. Sobre unha reserva mínima de 60 módulos horarios ao longo da semana, a empresa fai unha proposta total de 212 módulos horarios ao Concello.