Os grandes retos de Martiño Noriega en Santiago
Anuncia que buscará "vías" para "minorar o impacto" duns orzamentos prorrogados "limitativos", con 20 millóns menos, tras votar conxuntamente PP, BNG e PSOE en contra das contas municipais.
Por E.P. | SANTIAGO DE COMPOSTELA | 04/01/2019 | Actualizada ás 14:31
O alcalde de Santiago, Martiño Noriega, asegurou que o goberno local buscará "vías", a través de decretos ou modificativos de crédito, para tratar de "minorar o impacto" do rexeitamento aos orzamentos municipais para 2019 e a prórroga dunhas contas "limitativas", aínda que, en todo caso, admitiu que non poderán "emendar na totalidade" os proxectos.
En resposta a preguntas dos medios, o rexedor compostelán cifrou en 20 millóns de euros menos a cantidade da que disporá o consistorio ao prorrogar os orzamentos deste ano e indicou que esta situación fará difícil levar adiante novos contratos en licitación, como o da ludoteca, ou melloras comprometidas en materia de persoal, como é o caso de contratacións para a Policía Local.
Ante esta situación "limitativa", Noriega expón "dúas vías", ben os modificativos de crédito, "sobre todo no capítulo dos investimentos", e os decretos, que busca aplicar no ámbito de persoal.
A priori, o rexedor rexeitou concretar de que partidas poderían detraerse os fondos para facer os modificativos de crédito, unha decisión que se analizará a partir do próximo luns buscando "priorizar" as actuacións en función da súa importancia. No entanto, si puxo exemplos como a cantidade destinada o ano pasado á celebración do mundial de xadrez, que non será necesaria este exercicio. "O que queda claro é que non se van a poder emendar os 20 millóns de euros", dixo Noriega.
PASARELA DA INTERMODAL
Entre os proxectos afectados polo rexeitamento aos orzamentos está a achega municipal á pasarela da nova estación intermodal, unha cuestión que formará parte dos modificativos de crédito que busca levar adiante o goberno local.
Sobre se será capaz de aprobar estas modificacións, Noriega argumentou que considera que é necesario "actuar con responsabilidade" e que hai cuestións nas que "non hai nada que negociar" cos outros grupos. "Non debería haber problema", explicou o alcalde, que recordou que, por exemplo, "non hai marxe para negociar a achega á pasarela da intermodal", que xa foi debatida en sesión plenaria e está comprometida.
Outra das cuestións afectadas é a oferta de emprego para o corpo da Policía Local, para a que o alcalde comprometeu o esforzo do goberno local coa intención de minorar as consecuencias. Sobre este tema, recordou que a oferta foi avalada por todos os sindicatos.
