A Xunta pide a retirada da reforma da LOMCE do PSOE porque "é unha volta ao pasado"

Os conselleiros de Educación das comunidades autónomas nas que goberna o Partido Popular, entre elas Galicia, pediron a retirada do anteproxecto de lei para cambiar o sistema educativo actual recollido na LOMCE e propuxeron sentar a dialogar porque consideran que a reforma é "unha volta atrás".

As comunidades gobernadas polos conservadores cren que é unha das consecuencias de ter "compromisos políticos que se adquiriron coa investidura do presidente Pedro Sánchez".

Así o destacou o conselleiro de Educación da Comunidade de Madrid, Rafael Van Grieken, ao termo da Conferencia Sectorial de Educación ao considear que a reforma da lei educativa "non estivo consensuada nin debatida" previamente porque o Goberno ten "compromisos" cos partidos políticos que apoiaron a moción de censura a Mariano Rajoy.

"É unha cuestión de pensar no país, sentarnos a dialogar e retirar ese anteproxecto para retomar esa senda de diálogo que o PP puxera enriba da mesa para ter unha mellor educación en España", destacou o conselleiro madrileño que insiste en que cambiar a lei é "simplemente unha volta atrás" no sistema educativo que agora require de "necesidades totalmente diferentes" como son "os métodos innovadores ou a dixitalización".

A conselleira de Educación da Xunta de Galicia, Carmen Pomar, tamén mostrou o seu rexeitamento para modificar o sistema educativo actual que se rexe pola LOMCE ao considerar que é unha reforma que "surfea na superficialidad" ademais de ser "unha volta ao pasado".

Pomar apostou por manter unha lei "que entra na profundidade do sistema" e, ademais, ten "visión de futuro", apoiando así o seu compañeiro da Comunidade de Madrid.

"Dicimos si a un sistema educativo que contemple a calidade e a equidade, que sexa flexible en canto aos intereses do alumnado, que teña competencias do século XXI nunha realidade tecnolóxica e plurilingüe que respecte a liberdade, empezando pola elección das familias para elixir centro educativo para os seus fillos", sentenciou a conselleira.

Pola súa banda, o conselleiro de Castela e León, Fernando Rei, confesou que hai "moi poucas probabilidades de que este texto poida entrar en vigor" ao pasar ás Cortes. "En realidade, hoxe cumpriuse un trámite formal e asistimos ao típico pendulazo de partido que goberna, partido que impón a súa visión", recalcou Rei.

Segundo Rei, quedou claro na reunión que as autonomías onde gobernan os nacionalistas son favorables ao texto do Goberno porque lles beneficia.