Sobe un 12,6% a creación de empresas en Galicia
É a segunda comunidade onde máis aumentou este parámetro en novembro, pero tamén medrou o número de disolucións de sociedades (un 24%)
Por E.P. | SANTIAGO DE COMPOSTELA | 10/01/2019 | Actualizada ás 11:06
O número de novas sociedades mercantís subiu un 12,6% en novembro de 2018 en Galicia en relación ao mesmo mes de 2017, ata 340 operacións, segundo os datos que publica este xoves o Instituto Nacional de Estadística (INE).
Deste xeito, Galicia é a segunda comunidade na que máis aumenta a creación de empresas, só por detrás de Navarra (24,6%), e nove puntos por encima da media española de subida (3,3%).
Tras experimentar a maior caída interanual de creación de empresas en agosto, os datos mantivéronse invariables en setembro, mentres que en outubro comezaron a subir de novo (+3,1%) e en novembro eleváronse sobre a media (+12,6%).
O capital subscrito polas 340 sociedades mercantís creadas foi de 17 millóns de euros, o mesmo que o desembolsado. Todas foron sociedades limitadas salvo unha sociedade anónima (con 60.000 euros desembolsados).
ALZA DAS DISOLUCIóNS
Con todo, as disolucións de compañías tamén van á alza en Galicia en novembro (+23,9%) e alcanzan as 135, moi por encima da media estatal (+9,9%). Sitúase asi como a sexta autonomía con maior aumento de desaparicións empresariais. As 135 empresas galegas disoltas foron: 115 de forma voluntaria, seis por fusión e 14 na categoría doutro tipo.
Pola súa banda, ampliaron capital 103 empresas, por valor de 38,4 millóns (seis sociedades anónimas por 3,9 millóns e 97 sociedades limitadas por 34,5 millóns). En cambio, reducírono 26 compañías por case nove millóns de euros.
