Dous millóns de euros para proxectos socioculturais previos ao Xacobeo 2021

A Xunta de Galicia lanzará "nos próximos días" 'O teu Xacobeo', unha convocatoria aberta que contará cun investimento de dous millóns de euros para cofinanciar proxectos socioculturais previos ao Xacobeo 2021.

O Goberno galego busca así "implicar e fomentar" a participación de "todos os axentes da sociedade" para desenvolver unha programación sociocultural que anticipe a celebración do Ano Santo. Tal como sinalou a Xunta, calquera cidadán ou entidade, tanto de carácter público como privado, poderá presentar as súas propostas para levalas a cabo ata abril de 2020.

Dotado cun investimento de dous millóns de euros, 'O teu Xacobeo' concederá, en réxime de concorrencia competitiva, subvencións a novos proxectos de dinamización relativos a cinco áreas: ámbito artístico, patrimonio-historia-pensamento-espiritualidade, gastronomía, deporte e ámbito social.

"O obxectivo é que o Ano Santo sexa un proxecto de todos", explicou o presidente da Xunta, Alberto Núñez Feijóo. "Seguro que todos teñen ideas brillantes. A ver que cousas podemos facer entre todos", engadiu.

Poderán optar a estas axudas económicas tres tipos diferentes de solicitantes: entidades locais, onde se inclúen os concellos galegos e as deputacións, entre outras; entidades privadas, tanto persoas físicas como xurídicas; así como entidades públicas ou privadas sen ánimo de lucro.

No caso das organizacións públicas, 'O teu Xacobeo' estará dotado con 875.000 euros para subvencionar, en función do tamaño demográfico, un máximo do 85% do proxecto e ata 50.000 euros. Pola súa banda, as entidades privadas disporán de 825.000 euros adicionais que cubrirán ata o 60% do proxecto ou 25.000 euros.

Para rematar, as organizacións sen ánimo de lucro optarán a 300.000 euros, con axudas de ata o 90% do proxecto, cun máximo de 20.000 euros.

Núñez Feijóo engadiu, ademais, que os principais criterios que se terán en conta á hora de distribuír as axudas serán a calidade do proxecto e o contido das actividades, así como "a difusión, a viabilidade e a sustentabilidade".

'O teu Xacobeo' forma parte de toda unha serie de medidas coas que o Goberno galego está a asentar as bases do próximo Ano Santo, a través da Consellería de Cultura e Turismo, cun investimento total de 30 millóns de euros.