Por E.P. | SANTIAGO DE COMPOSTELA | 11/01/2019 | Actualizada ás 14:53
O alcalde de Santiago de Compostela interpretou que a denuncia presentada pola empresa Doal sobre a adxudicación do servizo da ORA e o guindastre "tería chegado igual", con independencia da decisión do Goberno local de optar pola municipalización do servizo en lugar dun novo proceso de adxudicación, dúas posibilidades contempladas polo informe xurídico co que traballou Compostela Aberta.
Noriega puntualizou que a "decisión política" da que falou o pasado xoves se deu no caso de que no escrito do secretario da asesoría xurídica, Javier Castiñeiras, "se abrise a posibilidade de recoñecer o dereito de explotación do servizo a Doal".
O alcalde argumentou que a denuncia de Doal se produciu con independencia da decisión tomada polo Goberno Local: "Se abrísemos un novo concurso seguiría denunciando porque argumentaría que tiña dereitos; se facemos como fixemos, Doal denunciou. é unha decisión política nesa marxe, pero a denuncia tería chegado igual".
Logo dun día no que compareceron representantes das catro formacións da corporación local, Noriega dixo que "é un debate no que as posturas están fixadas". "Os feitos están aí, cada un compra o discurso que quere comprar", engadiu.
Noriega ironizou sobre "as moitas denuncias doutras épocas que chegaron neste mandato e que non tiveron ningún eco porque non podían ser vinculadas de ningún xeito á xestión do goberno local". Respecto diso, engadiu que esta sentenza "tampouco pode" ser vinculada coa acción de Goberno de Compostela Aberta, pero lamentou que, "intencionadamente, a uns meses das eleccións, se tenta vincular" co seu equipo.
Sobre este asunto, Noriega afirmou ter "a conciencia moi tranquila" porque está "convencido de que se en 2011 se tivese atendido a advertencia ou posteriormente se tivese feito a revisión" non se tería chegado a esta situación. "Trátase de embarrar o campo e, curiosamente, os que máis intentan culpabilizar ao goberno actual teñen competencias directas no que pasou", sentenciou.
CRÍTICAS AO BNG
Preguntado pola proposta do Bloque Nacionalista Galego (BNG) de bautizar a estación intermodal co nome de Daniel Rodríguez Castelao, Noriega apoiou a moción, pero aproveitou para lamentar a postura dos nacionalistas noutros asuntos do edificio.
Así, recordou que a postura do BNG foi "híper crítica con todo o proxecto e cos traballos que se fixeron para lograr acordos", e fixo referencia á negativa dos nacionalistas de apoiar os orzamentos.
No entanto, celebrou a iniciativa do Bloque co nome, xa que iso significa que "o BNG chegou á conclusión de que é unha infraestrutura digna para a cidade, o que é aínda mellor".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.