O PP avisa que a "ruptura" de En Marea no Parlamento suporá un "custo adicional" para os galegos

O secretario xeral do PPdeG cre que os votantes desta formación están "moi decepcionados" e compara á oposición con "o camarote dos irmáns Marx"

Por E.P. | SANTIAGO DE COMPOSTELA | 11/01/2019 | Actualizada ás 15:47

Comparte esta noticia

O secretario xeral do PPDEG, Miguel Tellado, abordou este venres "culebrón" da crise interna de En Marea e advertiu que a súa "ruptura" no Parlamento galego e a posible creación do Grupo Mixto suporá un "custo adicional" para os galegos. Nunha rolda de prensa celebrada en Santiago, lamentou que os "caprichos" e "loitas internas" do partido instrumental, que se agudizaron co inicio do proceso de primarias o pasado mes de decembro, váialles a "custar diñeiro" aos cidadáns.

O secretario xeral do PPDEG, Miguel Tellado, en rolda de prensa. PPDEG
O secretario xeral do PPDEG, Miguel Tellado, en rolda de prensa. PPDEG | Fonte: Europa Press

Ademais, recordou que xa no ano 2012 o BNG "rompía" tras un proceso de primarias "que perderon os amigos" do histórico nacionalista Xosé Manuel Beiras, o que levou a creación de Anova. "A historia está condenada a repetirse de forma continuada", apuntou Tellado. E é que agora, --continuou--, a "incógnita" con En Marea "non é se van romper, senón cando e onde van romper", posto que os populares están "convencidos de que, lamentablemente, haberá Grupo Mixto" no Pazo do Hórreo.

No entanto, o secretario xeral do PPDEG tamén se pregunta quen o conformará, "se serán os de Villares, os de Podemos ou os de Anova". "A ruptura do rupturismo galego", resumiu. Seguidamente, estimou que os votantes de En Marea deben estar "moi decepcionados" con estar a pagar o soldo a representantes políticos "que non fan propostas para mellorar Galicia, senón que dedican todo o seu tempo a conspirar uns con outros para romper o proxecto político".

UN PSDEG "CAINITA"

Na rolda de prensa deste venres, Tellado tamén esgrimiu que o PSDEG é unha "especie de sucursal" de Pedro Sánchez en Galicia, cun delegado do Goberno (Javier Losada) "encargado de anestesiar" o partido e "un señor que tivo moita présa" en ser elixido candidato a unhas eleccións "non convocadas", tal e como esgrimiu en referencia velada ao líder dos socialistas galegos, Gonzalo Caballero.

E é que, segundo o número dous do PPDEG, no PSDEG "hai voces que se alzan que din que se amordaza aos que non pensan igual" que o secretario xeral. Ademais, asegurou que Caballero, coa ruptura de En Marea, podería converterse en líder da oposición no Parlamento "sen facer nada". "O Partido Socialista está nunha situación complicada, cainita. O principal inimigo do Partido Socialista en Galicia sempre foi o propio Partido Socialista", sentenciou, para despois comparar o "camarote dos irmáns Marx" cun hipotético goberno dirixido polos tres grupos da oposición.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta