Os incendios seguen castigando Galicia en pleno inverno
Un lume na parroquia de San Martiño de Duio, en Fisterra, calcina 26 hectáreas e chega até o mar.
Por Galicia Confidencial | Santiago de Compostela | 13/01/2019 | Actualizada ás 14:07
O incendio forestal da parroquia de San Martiño de Duio do concello coruñés de Fisterra quedou estabilizado este domingo ao redor das 12,30 horas, informou a Consellería do Medio Rural.
O lume, que comezou este domingo ás 06,58 horas, afecta a preto de 26 hectáreas. Na súa extinción traballaban dous axentes, dúas brigadas, dúas motobombas e un helicóptero.
O fogo chegou ao bordo do mar, impulsado polo vento, deixando imaxes dantescas.
A Consellería lembra que está a disposición da cidadanía o número de teléfono gratuíto 085, ao que deben chamar no caso de detectar algún lume forestal.
De acordo coas cifras globais da Consellería de Medio Rural, en pouco máis de dez días (do 30 de decembro ao 9 de xaneiro) Galicia tivo 104 avisos de incendio, dos que 65 se transformaron en lumes e 44 quedaron en conatos (o 68%).
