A recuperación da zona afectada polas riadas en Viveiro custará máis de 250.000 euros

A alcaldesa de Viveiro (Lugo), María Loureiro, informou este mércores de que as actuacións de competencia municipal que se teñen que levar a cabo para recuperar a zona tras as riadas do pasado mes de novembro, "superan os 250.000 euros".

Por iso pide "colaboración", explicou, ao resto de administracións porque "é inviable que o Concello poida asumir todos os gastos, tendo en conta que xa se tramitaron todas as axudas ás que nos podiamos acoller", recoñeceu.

Entre os traballos necesarios inclúese a reconstrución de camiños, do lavadoiro municipal e varias pistas polas que non se pode transitar actualmente. "Sobre todo no primeiro mes levaron a cabo moitos labores de limpeza, por parte do Concello e doutras administracións, pero aínda queda moito, sobre todo na zona cero, de Xunqueira, pero tamén hai outras afectadas, como a parroquia de Magazos, que é unha zona rural que quedou desfeita", explicou a alcaldesa.

A rexedora concretou que Augas de Galicia -con quen mantivo este martes unha reunión para analizar estes labores pendentes- vai realizar un estudo hidrográfico que recolla varias recomendacións para as construcións que hai que realizar despois do desastre xerado polas riadas, nas que faleceu unha veciña do barrio de Xunqueira que se atopaba na parte baixa da súa vivenda.