O Parlamento reclama á Xunta que licite en Ourense un centro de atención a persoas con diversidade funcional
Reclama tamén que o Goberno galego se comprometa en firme para que o centro estea preparado para o 2020.
Por E.P. | SANTIAGO DE COMPOSTELA | 16/01/2019 | Actualizada ás 19:58
O Parlamento de Galicia instou por unanimidade á Xunta de Galicia a que poña en marcha medidas para licitar e pór en marcha un centro de atención para persoas con diversidade funcional maiores de 21 anos en Ourense. A proposición non de lei, presentada polo Grupo Socialista, foi debatida este mércores na Comisión de Sanidade e aprobada co voto a favor de todos os grupos.
En concreto, a iniciativa pide á Xunta que licite a obra do centro de atención para persoas con diversidade funcional de Ourense destinado a maiores de 21 anos antes de maio deste ano, así como que estean listos os pregos que rexerán o procedemento de adxudicación e o seu equipamento.
Do mesmo xeito, reclama ao Goberno galego que se comprometa "firmemente" para que o centro estea "a pleno rendemento" no ano 2020. Finalmente, insta a adoptar "de xeito urxente todas as medidas precisas" para liquidar, mentres este centro non estea listo, "a falta de prazas públicas para persoas con discapacidade en Ourense".
