O PSdeG cre que "hai que seguir traballando" para lograr máis "compromiso" co investimento en Galicia

Gonzalo Caballero puxo en valor o aspecto social dos PGE e sinalou que os fondos destinados á nosa comunidade supoñen "máis investimento por habitante" ca en autonomías como Cataluña. Con todo, admitiu que "todos os proxectos poden ser mellorados"

Por E.P. | SANTIAGO DE COMPOSTELA | 19/01/2019 | Actualizada ás 14:33

Comparte esta noticia

O secretario xeral do PSDEG, Gonzalo Caballero, valorou positivamente o proxecto de Orzamentos Xerais do Estado presentado polo Goberno central, pero asegurou que "hai que seguir traballando" para conseguir "un maior compromiso" co investimento nas infraestruturas de Galicia.

Secretario xeral de PSDEG, Gonzalo Caballero. PSDEG
Secretario xeral de PSDEG, Gonzalo Caballero. PSDEG | Fonte: Europa Press

Caballero puxo en valor o compoñente "social" dos orzamentos do Goberno de Pedro Sánchez, dos que destacou que son "bos para a cidadanía". Asemade, recordou que os fondos que se destinan a Galicia son "superiores á media de España" e supoñen "máis investimento por habitante" que en autonomías como Cataluña, Navarra ou Euskadi.

Así mesmo, resaltou que máis dun millón de galegos "verán como se incrementan os seus ingresos" grazas aos orzamentos, debido á subida das pensións e dos soldos dos empregados públicos.

En canto ao investimento directo, o máximo dirixente do PSdeG recordou que estas contas permitirán a chegada da AVE a Galicia "nos prazos comprometidos" e salientou "o investimento histórico" de 4.325 millóns de euros para a construción de cinco fragatas nos estaleiros públicos de Ferrol.

Caballero sinalou que "todos os proxectos poden ser mellorados" e que os socialistas galegos están "comprometidos con Galicia en primeiro lugar", polo que traballan para "dar máis posibilidades de investimento en Galicia".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta