Anapana en Devils Tower

Nesta décimo quinta entrega de 'Viaxes sen Lee', o explorador emocional Gabriel Rei-Doval muda a Torre dos Demos polo Refuxio do Oso ó aperta-la meditación Anapana en Wyoming.

Por Gabriel Rei-Doval | Devils Tower (Wyoming, USA) | 21/01/2019 | Actualizada ás 12:30

Comparte esta noticia

Era o once de setembro, día de tódalas iras, en Nova York, Chile, Cataluña e tantos lugares do planeta. Chegara cedo a Devils Tower, sen a penumbra nin o misterio de Close Encounters of the Third Kind, coa convicción de ter completado as dúas primeiras fases descritas por Steven Spielberg.

En pleno Anapana en Devils Tower
En pleno Anapana en Devils Tower

Avistara innumerables veces a ira, emoción básica en calquera ser humano. Tíñaa apalpado e ata invocado o seu contacto en meditación dinámica. Útil ferramenta para deixala marchar sen danar outros seres. Mais na vida todo cambia; as formas de sentir, expresar e canalizar emocións tamén. A ira acostuma ser esa capa máis externa da cebola, a epiderme reactiva das nosas feridas. E a incapacidade para sanda-lo mal producido ou recibido, querendo ou non, mesmo de catedráticos en maldade, sempre produce o mesmo resultado: alienación do individuo.

No noso ser emocional hai tantas capas da cebola enmarañadas baixo a ira; múltiples (sub)emocións coma a dor, o agravio, a angustia, os celos, a culpa, a decepción, o desamor, a desconfianza, o desencanto, a desolación, a dúbida, o engano, a envexa, o fracaso, a frustración, a humillación, a impotencia, a incomprensión, a inxustiza, a inseguridade, o medo, o rexeitamento, a vergoña. Todo nun remexido de capas, por veces inaccesibles e caoticamente desorganizadas, do corpo emocional, en especial cando un se atrincheira no mundo do intelecto. Ese magma reactivo dirixe o mundo, esparexido en múltiples disfraces, como bombas de fragmentación invisibles que estouran cada tres segundos mentres o ego asegura que todo está baixo control. 

A segunda fase ideada por Spielberg, a evidencia, semellaba esmagadora, continua, indeleble. Cando polo visto as guerras xa acabaran, a malsá mente humana fixéraas máis devastadoras, globais, omnipresentes; e televisadas. 

Pero o once de setembro era un día tristemente senlleiro, evidencia de tódalas evidencias na primeira potencia mundial, en camiño inconsciente e inexorable a deixar de selo. Así que só quedaba a terceira fase: o contacto. Eu nin considerei unha maior intimidade coa ira social que nos rodea, nin con esa dureza silenciosa individual, igualmente daniña ca a explosiva xenreira fuxidía. Así que, apenas entrando en Devils Tower, comecei a devalar en contacto co perdón, a reconciliación... e a meditación.

Procurando o Refuxio do Oso
Procurando o Refuxio do Oso

Nestas andrómenas cavilaba mentres ascendía desde o Visitor Center ó cerne da montaña sagrada sen enxergar caras de espiritualidade nativo-americana. Looking Horse, líder da Gran Nación Lakota, solicitara recupera-lo nome tradicional da montaña, Bear Lodge, o Refuxio do Oso, obviando a errada tradución toponímica de 1906. A Torre dos Demos, Devils Tower, suxería unha esencia demoníaca nos rituais espirituais dos devanceiros indios. 

El habería culto máis demoníaco ca a mutación dos tradicionais machados Tomahawk en mísiles navais subsónicos, dos mitolóxicos paxaros trono en letais avións Thunderbird ou a apropiación da esperanzadora Ave Fénix por empresas coma Phoenix Weaponry? Onde estaría o refuxio dos demos no subcontinente norteamericano? Na montaña sagrada conoide nativoamericana de Wyoming ou no landmark pentagonal gringo de Virxinia? 

A ilóxica dúbida toponímica levaba á mesma rúa cega: a ira que non cesa. Así que, convertendo a Torre dos Demos na Pousada do Oso, tomei refuxio na meditación Anapana. No Refuxio do Oso, o once de setembro era tempo de para-la mente, nese lugar onde se derrete a ira e habitaban o perdón e a reconciliación. Era tempo de tomar refuxio en Anapana en Bear Lodge.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA