Pensionistas piden a mobilización da sociedade: "Hai que garantir as pensións do futuro"

Colectivos de pensionistas e xubilados fixeron un chamamento a toda a cidadanía galega para que participe o vindeiro sábado, día 26 de xaneiro, na manifestación convocada pola CIG para reclamar que se garantan unhas pensións públicas dignas. "Non é só por nós, é para garantir as pensións do futuro", avisan.

Representantes da Coordinadora nacional Galega de Emigrantes Retornados, da asociación 'Long Hope' de ex mariñeiros que reclaman as súas pensións a Noruega e integrantes do colectivo de xubilados da CIG ofreceron este luns en Santiago de Compostela unha rolda de prensa xunto ao secretario xeral do sindicato nacionalista, Paulo Carril.

Na súa intervención, Paulo Carril considerou que os poderes públicos deben garantir a sustentabilidade do sistema e a creación de emprego estable en condicións dignas xa que, segundo indicou, é o mecanismo prioritario para dotar ao sistema de pensións dos recursos suficientes.

Fronte a iso, denunciou que os cambios lexislativos postos en marcha na última década polos gobernos do PP e do PSOE están encamiñados a "empobrecer as pensións". "A situación é a que é porque a queren levar a ese punto, desmantelar o sistema público de pensións, un dereito conquistado con sangue, bágoas e dor polo conxunto da clase traballadora", subliñou o líder da CIG.

E é que, conforme indicou, a subida do 1,6% prevista para 2019 "non garante o poder adquisitivo" dos pensionistas galegos. "As pensións galegas son as segundas máis baixas do Estado español; un de cada dez pensionistas cobra menos de 415 euros, o 65% das pensións están por baixo do salario mínimo interprofesional SMI, unha de cada catro mulleres maior de 65 anos vive baixo a liña de pobreza", advertiu.

Neste contexto, ademais, mostrou a súa preocupación polo feito de que a revisión das pensións segundo o IPC "non estea plasmado na lei". "Demostra que se non hai mobilización, os orzamentos poden dicir unha cousa pero tamén a contraria. Ten que quedar garantido por lei", reivindicou.

AS MULLERES, ESPECIALMENTE AFECTADAS

A primeira das integrantes dos colectivos en tomar a palabra foi Lidia Fariña, dos pensionistas e xubilados da CIG. Na súa intervención, incidiu na especial incidencia que a brecha salarial ten no feito de que as mulleres galegas reciban pensións "máis baixas" e puxo o acento tamén na situación das que cobran pensións de viuvez.

Así mesmo, Xosé González, tamén da CIG, fixo un chamamento a todos os traballadores en activo a participar nesta marcha. "A nosa loita non é só por nós, é para manter as pensións do futuro porque sabemos que se se perde o dereito, a loita para volver conseguilo tense que multiplicar por mil", subliñou.

Pola súa banda, o portavoz da Coordinadora nacional galega de emigrantes retornados, Xosé Lois Leirós, considerou que "sobran os motivos" para saír á rúa o vindeiro sábado e defender "o dereito a ter unhas pensións dignas". "O noso colectivo seguirase manifestando para que o Goberno aprobe a lei que dorme no caixón desde hai tempo", destacou, para logo censurar que o Executivo de Sánchez "mire para outro lado" neste aspecto.

"Desaloxado Rajoy e Montoro do poder, o PSOE debe de cumprir o prometido, a ministra de Facenda, María Jesús Montero, está en débeda connosco. A loita dos emigrantes retornados continúa por unha Galicia sen estafas", subliñou.

Pola súa banda, Alberto Paz, recordou que a asociación 'Long Hope' leva cinco anos de loita e máis de 100 manifestacións para reclamar o seu dereito a unha pensión digna. "Sentímonos abandonados tanto polo goberno anterior como polo actual", sinalou para recordar que, a pesar de que "hai escasos meses" chegaron a un acordo co Ministerio de Exteriores para que rubicase un convenio bilateral con Noruega que arranxe a súa situación, "a día de hoxe" seguen "esperando unha resposta".