O primeiro pleno parlamentario do ano será sobre a sanidade pese o rexeitamento do PP á comparecencia de Almuiña

A situación da sanidade pública, marcada nas últimas semanas polas protestas dos profesionais e as demandas de melloras na atención primaria e a PAC, será un dos temas centrais no primeiro pleno do ano 2019 do Parlamento de Galicia, que renova a próxima semana o seu período de sesións tras o parón das festas do Nadal.

Con todo, a pesar da petición unánime dos grupos da oposición para que comparecese ante a Cámara o responsable de Sanidade do Goberno galego, Jesús Vázquez Almuiña; finalmente o conselleiro non terá que responder os deputados sobre a situación do sistema público logo do rexeitamento do grupo maioritario, o PPdeG.

Na rolda de prensa posterior á xunta de portavoces celebrada este martes, o popular Pedro Puy, negou que o seu grupo "vete" que Almuiña compareza na Cámara como denunciaran minutos antes os portavoces da oposición --Luís Villares (En Marea), Xoaquín Fernández Leiceaga (PsdeG) e Ana Pontón (BNG)--, que reclamaron que o conselleiro dése conta ante o hemiciclo da denuncia ante Fiscalía efectuada por profesionais do CHUS sobre a morte de dous pacientes nos corredores de urxencias do hospital santiagués o pasado 2 de xaneiro.

Cuestionado sobre este asunto, o portavoz parlamentario do PPDEG incidiu en que "a propia denunciante desmentiu" que estas persoas falecesen nos corredores de urxencias, o que lle levou a acusar os grupos da oposición de "contribuír a que haxa alarma social" ao redor da sanidade pública.

Ademais, Puy censura que a oposición rexistrase a petición de comparecencia do conselleiro o mesmo día que Almuiña acudía á comisión de investigación sobre o sistema sanitario, onde non participan En Marea, PsdeG e BNG a pesar de impulsar a súa creación. "Sorpréndeme que pidan a súa comparecencia logo de faltar pola mañá. A oposición practica un xogo pouco responsable e pouco serio", apostilou o popular.

OPOSICIÓN

Pola súa banda, a oposición lamenta que os populares se neguen" a responder ante a "grave situación" que atravesa a sanidade pública e, en concreto, o episodio do CHUS denunciado recentemente. Para Luís Villares, "o único despreocupado" pola situación do sistema sanitario "é o Goberno de Núñez Feijóo"; mentres Leiceaga puxo o foco en que o PP considera "máis urxente" que compareza a titular de Educación, Carmen Pomar, para explicar as liñas do seu departamento de aquí ao final de lexislatura antes de que o faga Almuiña.

Así mesmo, a portavoz frontista, Ana Pontón, o rexeitamento do PP a que Almuiña acuda á Cámara nestes momentos "deixa en evidencia a unha Xunta que non quere dar a cara" e que emprega "o rodete" do grupo maioritario para "instalar o relato da posverdad de que aquí non pasa nada". No entanto, os tres grupos levarán ao pleno diferentes iniciativas relativas á sanidade en ámbitos como a atención primaria ou o modelo de xestión do servizo de transporte de urxencia para pacientes. Ademais, PsdeG e BNG preguntarán ao presidente galego, Alberto Núñez Feijóo, sobre a situación da sanidade, un aspecto que tamén estará recollido na cuestión que exporá o portavoz rupturista, Luís Villares, que estenderá a súa pregunta ao "recorte de dereitos á cidadanía".

COMPARENCENCIAS DE CONSELLEIROS

Así as cousas, os conselleiros de Facenda, Valeriano Martínez; e Educación, Carmen Comar, comparecerán na Cámara a proposta do PpdeG. O primeiro farao para explicar o acordo alcanzado pola Xunta cos sindicatos CC.OO e UGT para a "recuperación" de dereitos dos traballadores públicos e o desenvolvemento da carreira profesional; mentres a segunda farao para explicar as liñas do seu departamento ata o final da lexislatura.

Por outra banda, o Grupo Popular, cuxo portavoz ironizou con que 22 dos 28 asuntos a tratar no primeiro pleno do ano están propostos pola "amordazada" oposición, preguntará ao Goberno sobre o anteproxecto dos Orzamentos Xerais do Estado (PGE) presentado a pasada semana polo Executivo central e acerca dos investimentos na central de Endesa nas Pontes (A Coruña).

INICIATIVAS DA OPOSICIÓN

Outro dos asuntos que centrarán o pleno que arrinca o vindeiro martes no Pazo do Hórreo será a situación do sector industrial en Galicia, en concreto, o electrointensivo e a situación xerada ao redor de Alcoa.

En Marea levará á Cámara unha iniciativa sobre a posible intervención da planta coruñesa ante a situación "límite" que atravesa; mentres os nacionalistas presentarán unha proposición de lei para regular o prezo da electricidade, tanto para as familias como para as empresas. Ademais, os socialistas cuestionarán ao Goberno sobre a posible implementación de novas medidas de seguridade no porto de Malpica (A Coruña) tras o accidente rexistrado a finais do pasado mes de decembro que custou a vida a un mariñeiro.

O PPDEG NON VE DERIVA Á EXTREMA DEREITA

O portavoz parlamentario do PPDEG, Pedro Puy, asegurou que os populares galegos non se senten "aludidos" cando os grupos da oposición critican ao Partido Popular pola súa "deriva" cara á "extrema dereita" tras a chegada á dirección do partido de Pablo Casado e, máis recentemente, co pacto alcanzado con Vox para chegar ao Goberno de Andalucía. Pedro Puy asegurou que dito argumento queda desmontado "a pouco que se analicen" os acordos entre PP e Vox e a "configuración" do novo Goberno andaluz.

Así, minutos despois de que o portavoz de En Marea, Luís Villares, volvese acusar aos populares de "saltarse o cordón sanitario" que existe en "toda" Europa contra a extrema dereita; Puy respondía o maxistrado que "non hai deriva autoritaria en ningunha forza política que estea representada no Parlamento de Galicia".

Facíao a colación das críticas lanzadas por Villares, que teorizaba con que "a relación a tres do PP está baseada na promiscuidade coa extrema dereita e ten como consecuencia o contaxio dunha deriva autoritaria e contraria aos dereitos e valores democráticos".

Ademais, o portavoz rupturista avanzou que o Grupo de En Marea pretende "abrir un debate" para as próximas sesións plenarias co obxectivo de "expor se é lexítimo en democracia establecer pactos con partidos que desprezan os dereitos fundamentais", en referencia ao partido que lidera Santiago Abascal.

Tamén os socialistas pretenden trasladar á Cámara galega o debate sobre as alianzas do PP co partido ultra Vox. Para iso, segundo expuxo o portavoz parlamentario do PsdeG, Xoaquín Fernández Leiceaga, levarán ao pleno da próxima semana dúas iniciativas sobre violencia de xénero e benestar animal. "Queremos saber cal é a postura do PPDEG despois de que pactasen con Vox", apostilou Leiceaga.