Imparten obradoiros de empoderamento feminino e novas masculinidades nun instituto de Ames
Está destinado ao alumnado adolescente do IES de Ames. O obxectivo é traballar a conciencia de xénero mediante dinámicas participativas e teatrais.
Por Galicia Confidencial | Ames | 23/01/2019 | Actualizada ás 09:00
A Concellaría de Servizos Sociais e Igualdade de Ames, mediante o Centro de Información da Muller do concello (CIM), e a ANPA do IES de Ames poñen en marcha este xoves, 24 de xaneiro, unha serie de obradoiros de empoderamento feminista e novas masculinidades destinado ao alumnado adolescente do centro.
O obxectivo é traballar con eles a conciencia de xénero mediante dinámicas participativas e teatrais e que tomen conciencia dos roles sexistas que xoga cada persoa, comprender de onde veñen socialmente, e comezar a tomar conciencia de cando, como, e para que os utilizamos na nosa vida.
Os talleres, que terán lugar os xoves de febreiro e marzo, en horario de 17.00 a 19.00 horas, irán destinados a que as mozas e mozos traballen de xeito conxunto "para desmecanizar o corpo e, así, conseguir desvelar a presencia de actitudes opresoras atendendo aos xéneros”, apuntan desde o concello. De feito, separarase o grupo por sexos e faranse dúas sesións diferenciadas.
Coas rapazas traballarase o empoderamento feminista, ao tempo que se lles ofrecen ferramentas en materia de prevención, autocoidado e autoxestión no ámbito da corporalidade; mentres que cos rapaces o traballo irá encamiñado a deconstruir e analizar as masculinidades hexemónicas. Para rematar, realizarase unha sesión conxunta destinada a traballar a convivencia positiva, as relacións de bo trato e o respecto.
REFERENCIAR O SEU CORPO
Ademais, o concello destaca nun comunicado que, ao longo de febreiro e marzo, pretenderase que as adolescentes teñan de referencia o seu corpo como “unha área básica e vital, e poidan incorporar unha identidade persoal á hora de relacionarse, tendo como referencia a corporalidade, a sensibilidade e a autoxestión”. Para iso, durante os talleres realizaranse exercicios adaptados cos que se traballarán aspectos como a flexibilidade, a forza corporal e a expresión de movementos para tentar corrixir as distintas descompensacións derivadas dos malos hábitos posturais.
“No tocante ás sesións dirixidas aos mozos, explorarase o que significa ser home na sociedade global de hoxe en día, como está relacionada co noso modo de vida e o que implica”, apunta. Así, “traballarase a apertura dos rapaces cara o bo trato consigo mesmos, como base dende a que impulsar ese trato en positivo co resto, desterrando as violencias machistas”, engade.
A este respecto, aconcelleira de Servizos Sociais e Igualdade, Luísa Feijóo, afirma que “a educación supón un verdadeiro investimento na prevención da violencia e no establecemento de relacións igualitarias entre homes e mulleres, e de aí que apostemos por este tipo de obradoiros entre a mocidade”.
