Por Antón Fernández | Pontevedra | 24/08/2011 | Actualizada ás 19:21
Dende a súa toma de posesión como deputado provincial polo BNG en 2007, o nacionalista Gabriel Martínez Giraldez traballou pola galeguización desta administración pública. Ao longo destes anos reuniu numerosa documentación que, segundo afirma a Galicia Confidencial, “impón o castelán dun xeito directo e a todos os niveis”.
Hai agora un mes fíxose pública unha sentenza que esixía á Deputación de Pontevedra que respectase a normativa lingüística de defensa do galego e pasase a publicar na nosa lingua o seu Boletin Oficial da Provincia (BOP). Foi grazas a varias denuncias de Gabriel Martínez que non deixou de teimar para que se cumprira a lei. Mais a imposición do castelán continúa. Para o ex-deputado as probas son claras. “Hai escritos dirixidos aos concellos para que remitan a documentación en castelán e non en galego”, denuncia. Mesmo comprobamos, sen moita dificultade, como hai todo tipo de publicidade institucional (cartelería, folletos de actos nos que participa a institución provincial, publicacións non periodicas) que prescinde da lingua galega.
A Deputación de Lugo tamén publica o seu boletín en castelán
Outra das irregularidades que denuncia Gabriel Martínez é a non utilización da toponimia oficial no caso de A Coruña. “A Deputación de Pontevedra chegou a recibir 30.014 euros para realizar actividades en materia de normalización lingüística”, informa o nacionalista, “esta grande aportación económica foi posible grazas a un acordo entre a Consellería de Educación e Ordenación Universitaria da Xunta de Galicia e a Federación Galega de Municipios e Provincias (FEGAMP). No seu momento solicitei as facturas pero non recibin ningún tipo de información”, asegura.
A Deputación de Pontevedra segue, a dia de hoxe, publicando o BOP en castelán. Outras Deputacións que tamén están a editar o seu boletín en castelán son as de Lugo e A Coruña mentres que a de Ourense é a única que ten o formato en galego e os textos nun sistema bilingüe. O propio Gabriel Martínez non entende o caso da Deputación de Lugo, onde o BNG está no goberno provincial, e solicita tamén que se respecte a normativa lingüística de defensa do galego.
A denuncia contra a Deputación de Pontevedra paso a paso
O 12 de xullo de 2010, Gabriel Martínez presentou un escrito na Deputación de Pontevedra solicitando que cesara a vulneración que en materia lingüística levaba a cabo o ente provincial. Remitiase as leis tanto do Estatuto de Autonomía como as da propia Deputación (Lei 3/1983 de Normalización Lingüística, Lei de Administración Local de Galicia, Lei 5/88 de uso do galego como lingua oficial polas entidades locais ou da propia Ordenanza de normalización lingüística da Deputación). Asimesmo solicitaba o nome dos funcionarios responsables desta iregulariedade.
O 29 de xullo de 2010 recibe contestación por parte do secretario da Deputación de Pontevedra no que se desestima a reclamación sinalando a defensa das linguas cooficiais que está na Constitución española. Tamén incorpora parte do Estatuto de Autonomía (na súa versión en castelán) na que reitera a cooficiliadade das dúas linguas.
O 26 de agosto de 2010 Gabriel Martínez presenta un recurso contra o que considera só un “informe” do secretario. Denuncia que a tradución da lexislación galega (neste caso o Estatuto) “é un xeito de reivindicación e interiorización do franquismo lingüístico” e reitera a súa reclamación advertindo, ademáis, “da posible comisión dun delito de prevaricación”.
O 8 de setembro de 2010 a Deputación contesta outra vez negativamente a solicitude do deputado nacionalista sinalando que “os recursos xurídicos do recurso non difiren dos establecidos no seu momento na reclamamación efectuada”.
Sentenza a favor dos argumentos do Deputado
Gabriel Martinez presenta entón un recurso contencioso-administrativo que se resolveu o pasado 15 de xullo de 2011 cunha sentenza na que se esixe á Deputación de Pontevedra “o exacto cumprimento da ordenanza referida coa íntegra publicación en galego do Boletín Oficial da Provincia (BOP), tanto no referido ao formato (...) como aos textos propios da administración provincial”. A institución provincial tivo de prazo quince días no caso de querer presentar recurso de apelación diante do TSXG.
GC facilita este dossier con varios documentos da Deputación só en español (incluído "Concello de La Coruña) e as interprelacións do Deputado (PDF).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.