A Policía ve "leve" a situación das agresións a sanitarios en Galicia
O ano pasado "non se chegou a unha vintena" deste tipo de delitos.
Por E.P. | A CORUÑA | 23/01/2019 | Actualizada ás 16:49
A Policía Nacional reuniuse este mércores cos responsables do sector sanitario da provincia da Coruña para informar sobre como evitar as agresións a profesionais sanitarios. O ano pasado, en Galicia, "non se chegou a unha vintena" deste tipo de delitos.
Así o manifestou o comisario Javier Galván, interlocutor policial sanitario da Policía Nacional, quen, xunto co xefe superior da Policía de Galicia, Manuel Vázquez, se reuniu este mércores con representantes do sector sanitario da provincia.
Galicia sitúase por baixo da media estatal neste tipo de incidentes, segundo a Policía, que informa que "a situación en Galicia é leve e estable, con independencia de que un único caso xa é moito, xa sexa unha agresión, unha ameaza ou un insulto".
Segundo manifestou Galván, o ano pasado en Galicia "non se pasou dunha vintena" deste tipo de delitos, que corresponden a agresións, lesións, coaccións, ameazas ou lesións.
Na mesma liña, Manuel Vázquez sinalou que desde o mes de setembro non se tivo constancia de ningunha agresión a profesionais sanitarios.
No entanto, o xefe superior subliñou o interese das forzas de seguridade do Estado por colaborar a previr estes incidentes. Por iso, impartirán charlas formativas aos profesionais da saúde do Complexo Hospitalario Universitario A Coruña (Chuac) e no Hospital Arquitecto Marcide de Ferrol.
