Por E.P. | SANTIAGO DE COMPOSTELA | 24/01/2019 | Actualizada ás 14:13
A portavoz nacional do BNG, Ana Pontón, asegurou que a apertura do procedemento sancionador da Comisión Europea contra España "desmonta a verdade oficial" articulada desde o Estado sobre as causas do accidente do tren Alvia en Angrois.
Este xoves, Pontón referiuse á apertura dun expediente sancionador por parte da Comisión Europea contra España ao considerar que os seus procedementos de control da seguridade ferroviaria "non cumpren os requisitos" que esixe a normativa comunitaria.
Bruxelas ve "deficiencias" na forma en que a Comisión de Investigación de Accidentes Ferroviarios (CIAF) "analiza e investiga os accidentes e incidentes", segundo informou a institución comunitaria nun comunicado.
A líder frontista atribúe a apertura deste proceso infractor á denuncia presentada pola eurodeputada do BNG, Ana Miranda, no marco do seu traballo parlamentario relativo á investigación da catástrofe de Angrois.
"Esperemos que sirva para facer xustiza para o Alvia", resaltou, para logo mostrar a súa confianza en que sirva para desmontar "a indecente mentira montada por PP e PSOE de que o único responsable era o maquinista". "Ana Pastor e Pepe Blanco débenlle moitas explicacións a este país e ás vítimas", resolveu Pontón.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.